Lis minorancis a àn vinçude la lôr sfide

Lis minorancis linguistichis dentri de Union Europeane a àn vinçude la lôr sfide.
E à vût un sucès spetacolâr, di fat, la iniziative civiche Minority SafePack, che e à ufiert ai citadins la ocasion di miorâ, cu la proprie firme (ancje eletroniche), la posizion des minorancis etnichis linguistichis a nivel european. Si tratave di cjapâ sù un milion di firmis par impegnâ la Union Europeane a inviâ une serie di misuris intal rispiet e inte valorizazion de varietât culturâl e linguistiche che e caraterize il Vieri Continent, dulà che plui o mancul 50 milions di personis a son di une comunitât di minorance. A son stadis racueltis cuasi 216 mil firmis in plui. Al jere ancje necessari che almancul 7 Stâts membris de Union Europeane a rivassin al limit minim che ur jere stât assegnât, che pe Italie al jere di 55 mil, superât benon cun plui di 60 mil firmis.
La campagne Minority SafePack e je stade inviade de FUEN, la Union Federâl des Nazionalitâts Europeanis, che e ten dongje associazions e altris entitâts che a son espression di diviersis comunitâts dal continent. ❚
Redazion