(L)INT FURLANE. Su la linee dal fûc

O ai acetât cun braùre e rispiet la candidature a sindic di Udin intes filis dal “Pat pe autonomie”. E je la conclusion, o disarès logjiche, di un percors coletîf tacât trê agns indaûr cui “Laboratoris” che a àn dât gnove linfe e gnûfs protagoniscj ae bataie autonomiste cun in prime file zovins sindics, espression di un rapuart intens e diret cu la proprie int.
La interpretazion de realtât regjonâl midiant de lint identitarie e je stade la clâf par une riprese de stagjon autonomiste e furlane. Lôr a àn dât flât e cuarp al progjet politic dal “Pat”, a àn fat pussibile la unitât eletorâl, e no dome, di chei grups e partîts, “Manoâi di Jalmic” e “Patrie Furlane”, pardabon presints e ancorâts al teritori.
Un percors che la “Clape culturâl Patrie dal Friûl”, che mi onori di jessi president, e à condividût tant che element di fonde dai laboratoris e che dopo e à seguît cun atenzion intal so evolvisi.
La sielte duncje de mê candidature e je clare e trasparente dal moment che a ognidun di nô, che o poìn convints la bataie par un Friûl libar e autonom,  al ven domandât di “esponisi” in maniere publiche intes listis eletorâls e, ancjetant in maniere publiche, di afermâ i nestris ideâi.
Al esist però un altri probleme e al rivuarde cheste mê rubriche su la “Patrie”, che us acompagne di tancj agns.
Se di fat in sens storic ae Clape i apartegnin lis decisions politichis, chês dal gjornâl, dai siei contignûts, dai siei articui  si colochin intune sfere mai abandonade: chê di indreçâsi a ducj i furlans, al popul furlan intal so insiemi intune operazion di emancipazion coletive che e va di là des sielte ideologjichis o di formazion e di vôt.
Convint di cheste distinzion di rûi che no je dome gjornalistiche ma che e smire a passâ divisions e contradizions presintis ancjemò inte nestre int, o stimi just no jessi un fatôr discriminant e sospindi duncje cheste rubriche amade.
Par chescj mês fasêtint di mancul, savint che dut câs lis fuarcis a son impegnadis su di un altri front.
O sin su la linie dal fûc: al è impuartant savêlu e viodi clâr che no son gjenerâi e colonei daûr che nus sburtin fûr de trincee.
E je une nestre sielte, o volarès clamâle dovê, lâ al assalt par difindi il Friûl.
Dree Valcic