LInt AUTONOMISTE. Scjalâ la muraie

La decision de Consulte taliane su la cuistion da lenghe e je dome l’ultin modon di une preson, di une muraie che nus stan fasint sù ator ator. Vê cussience di cheste realtât nol vûl dî jessi plaiots o pardabon chei che a son simpri daûr a vaî su cemût che a van lis robis. Al contrari, al pues coventâ a pensâ in ce maniere finalmentri butâ jù chê muraie o ancje semplicementri cemût passâi parsore.
A cjalâ plui indenant, ma soredut a capî parcè che al sucedi cumò e parcè che al podarà tornâ a sucedi un doman. A metisi ben tal cjâf che il stât talian, e cun lui ogni struture aes sôs dipendencis, nol podarà mai concepî di meti adun regolaments e legjislazions che, ancje dome tal titul, a puedin jessi consideradis contrariis ae Italie une e indivisibile.
Se o viodìn ce che al è vignût fûr tai ultins mês, si inacuarzarìn che l’atac al è rivât su tancj fronts: de Universitât, de Orchestre Sinfoniche, par finî cu la trombonade de leç su la scuele. A stan doprant la cuistion de crisi par dî che no son bêçs e che dutis chês altris robis a son secondariis: l’interès de culture furlane al pues ben spietâ. Ce strani, cumò e va di mode «razionalizzare ed evitare doppioni» tra Udin e Triest, e come simpri o paìn noaltris.
Ma o vin dite di saltâ il mûr.
In chest câs, si à di fâsi une domande: chei che si clamin autonomiscj, furlaniscj, a àn clâr tal cjâf che no pues jessi mediazion tra l’interès dal Friûl e chel de Italie, di Triest. E pues esisti dome une corispondence, che o vin di decidi noaltris. Cheste e je la fonde dal nestri concet di sussidiarietât.
Fin cumò, tai ultins agns, la rispueste al domini dal pinsîr centralist e je stade tes mans dai Comitâts, dai Forum, des associazions, dai oms e des feminis che a àn cirût di cuintribati, di tignî dongje la int, di condizionâ in cualchi maniere la politiche e i partîts.
Ma la politiche taliane no à tal so Dna la cuistion furlane, ni fintremai nissune cuistion nazionalitarie. No je rivade nancje ae sô di identitât, figurìnsi se e pense a chê des minorancis. Al contrari, le viôt tant che un pericul, un fatôr di disgregazion. Leiêt la ande des declarazions sul parcè che la leç e jere di scancelâ, par vê la conferme.
Come che al diseve pre Checo, i partîts a àn pôre dome di pierdi vôts, e su chest nivel ca si scuen fâ la bataie.
Jessi in cualchi mût obleâts a votâ pai partîts talians, al gjave credibilitât a ogni forme di difese dal Friûl; ricognossi a chei partîts une cualchi credibilitât e dignitât, al puarte indaûr la cussience dai furlans.
Tant di cjapiel, ricognossince ai comitâts che naturalmentri a àn il dirit e cuasi il dovê di lâ indenant te mobilitazion e tal impegn, ma al Friûl e ai furlans, o disarès ae democrazie, par scjalâ chel mûr ur covente une scjale gnove.
Cence ilusions, ancje a cost di passâ par presuntuôs, ma cheste e je le domande presinte tra chei che no pensin di molâ.
Al è un mont difûr che nus spiete.
Dree Valcic