LInt AUTONOMISTE. Lenghe furlane sui media talians? Miôr fevelâ di robis seriis

Impiâ un fulminant dongje la lenghe, e o sin sigûrs che si inflame la pradarie. Paraltri, al è curiôs  che cheste volte o sedin tirâts dentri «di straforo», ma tal finâl pestâts ben e no mâl. Di cualchi bande de çampe, in primis, par dâi cuintri ae campagne de Leghe sui dialets, no àn cjatât di miôr che lâ a spilucâ su lis pocjis, e fintrimai cence bêçs, manieris di aplicazion de lec.
O ai scrit bielzà sul no stâ a pensâ e a bruntulâ tant su cheste campagne di opinion dai gjornâi talians. Al dûl viodi che propit doi gjornalist furlans si sedin prestâts al zûc, ma visaitsi che cussì le pense une biele fete dai inteletualons di chenti.
Mi pâr logjic che plui e sarà fuarte la rispueste, miôr al sarà pe figure de marilenghe, ma soredut par chei, cun mil dificoltâts, che si doprin tes scuelis, tai uficis, tes associazions par, pratichementri, puartâ indenant i progjets sul furlan.
Ma no stin pierdisi daûr lis monadis che nus contin: nus tocje se no, tornâ a scomençâ ogni volte dal principi. E no vin timp.
Plui interessant mi somee, invezit, fâ cognossi simpri di plui lis iniziativis che si cjapin, che a nassin ator (il contribût origjinâl de «Patrie» mi somee fenomenâl). Lâ drets pe nestre strade.
Par sierâ cul argoment, al vorès ancje che cualchidun nol pensàs sul seri al furlan e ai siei uficis come a un afâr. Secont me sui bêçs, par esempli, dai Celtis, sparniçâts de Guerra, no je tant criticabile la cifre stanziade, nuie rispiet a secui di indutrinament su la ereditât di Rome, ma pluitost il fat che non sedi state produsude nissune opere di cualitât, che non vedi lassât nissun segn.
Partint di chestis considerazions e duncje ribaltant la logjiche des robis, o podìn frontâ ancje un altri argoment che al à tignût bot sui gjornâi, ven a stâi la cuistion des provinciis e de lôr riduzion, come proponût dal president Fontanini.
Ancje chi dome bufulis, parcè che nissun al à pardabon la intenzion di meti man ae riforme istituzionâl de Regjon.
Par un motîf semplicissim: al volarès dî discuti su la Regjon stesse.
Al sarès come discuti sul aredament di un apartament, prime di tirâ sù il palaç.
Di sigûr al pues jessi interessant studiâ une maniere gnove di organizâ il teritori, ma dentri la logjiche di un Friûl unît e sistemât cuntune sô muse istituzionâl. Bastarès ricuardâsi de cuestion de provincie de Cjargne e dal referendum. Intun Friûl autonom la Mont, ma ancje la Basse o lis valadis dal Nadison, a àn dirit a viodisi ricognossude une forme organizative e aministrative particolâr. Al contrari, lis formis che il Stât talian al pues ricognossi a chestis «Zonis» no son altri che un smicjâ ae disgregazion de unitât furlane.
Dree Valcic