✽✽ Setembar al è il mês plui biel di vivi in Friûl. Al è il timp dai colôrs incredibii, des sagris, ma vuê il virus incognit al dete la sô leç, al gjave ciertecis e tradizions secolârs. In chestis zornadis, al somee cuasi che il mont contadin al vueli fâ tornâ a vignî fûr il so Dna, ricuardantnus a nô furlans che o sin fîs de tiere, che dopo lis faturis dal semenâ e dal racuei, al rive il moment dal stâ insiemi, dal celebrâ il risultât dal lavôr.
✽✽ Dificil fevelâ cumò di “bal sul breâr”, in moments tant che chescj, ancjemò sospindûts tra inciertecis sanitariis, pinsîr pal puest in fabriche, in ufici, te buteghe, preocupâts plui di simpri pal nestri futûr, personâl e coletîf.
✽✽ Chel doman che si zuie in chestis setemanis intal mont de scuele, dulà che i dubis a vegnin alimentâts ogni dì, invezit che jessi cidinâts, de incongruence des decisions ministeriâls, dal continui e mutuâl butâsi in muse lis responsabilitâts tra stât e regjon, cheste ultime che no je in stât di programâ di là de emergjence, cuntune fisionomie e filosofie proprie di disvilup.
✽✽ Dibant rimarcâ ancjemò une volte il timp pierdût in chescj mês, un timp che si varès podût doprâ par organizâ rispuestis concretis, magari olsant, cirint soluzions alternativis, sigûr no facilis, ma dut câs percoribilis.
✽✽ Jessi creatîfs nol vûl dî jessi stravagants o ecentrics, ma rivâ a adatâ, inventâ modei di disvilup ancje fûr dai canui classics, dai canâi uficiâi dispès “oturâts” di une burocrazie otuse e danose. Une origjinalitât ancjemò plui necessarie cuant che si inacuarzisi che chescj percors, plui che segnâts dal sintiment e dal ben comun, a son tes mans dal podê de lotizazion dai partîts.
✽✽ Il resonament nol vâl dome pe scuele: se o larìn daûr des stradis normâls de aministrazion regjonâl, i fonts europeans, che a rivaran ancje chi, a corin il pericul di jessi impegnâts cu la stesse logjiche di simpri, dulà che al coste di plui l’afidament al studi di progjetazion che no la opare di fâ, o i compens al consei di aministrazion di turni a pet dal faturât de imprese.
✽✽ “Autonomie” duncje, e restarà ancjemò une volte une peraule vueide, peade ae logjiche dal profit e de spartizion, decidude des segretariis dai partîts romans e des lôr sucursâls locâls.
✽✽ Te ombre di une classe dirigjente furlane simpri mancul in stât di viodi di là de ponte dal so nâs. ❚
