Sfuei Mensîl Furlan Indipendent
Archivi de Patrie

L’imni ae Patrie dal Friûl cjantât des vôs blancjis di VocinVolo

Moira Pezzetta
Lis vôs blancjis di VocinVolo

Ancje chest an o vin tantis ocasions par celebrâ la Fieste de nestre Patrie dal Friûl ai 3 di Avrîl. Une fieste di passâ in comunitât, e festezâ i valôrs culturâi e linguistics dal popul furlan. Ce di miôr di une cjançon par celebrâ la identitât dai Furlans, in Patrie e ator pal mont? Cussì, ogni an si gjoldìn une gnove version dal Imni uficiâl dal Friûl “Incuintri al doman”.
◆ Il video dal gnûf imni al è stât publicât su lis pagjinis Facebook e Youtube de ARLeF, che e à finanziât, adun cu la Regjon, chest gnûf progjet promovût dal Istitût Ladin Furlan “Pre Checo Placerean”. A cjantâ la gnove version al è il côr di vôs blancjis VocinVolo di Udin, direzût di Lucia Follador e acompagnât al piano di Alessio Domini.
◆ L’imni al Friûl, che al cjape i furlans intune emozion simpri gnove, al met in lûs il sun limpi des vôs des frutis e dai fruts di VocinVolo intune curnîs cetant biele. Il video, delicât e elegant, cu la regjie firmade di Giorgio Milocco – Quasar al e stât zirât te residence storiche di Vile Gallici Deciani, a Montegnà di Cjassà.
◆ Il satûl preziôs dal imni dai furlans al è stât realizât in gracie des musichis scritis di Valter Sivilotti e des peraulis di Renato Stroili Gurisatti.
Il côr di VocinVolo e je une realtât cetant laboriose, nassude tal 2006 inte suaze de Associazion Ritmea di Udin. Il nestri gjornâl al à za vût mût di scrivi di lôr:
https://www.lapatriedalfriul.org/e-ven-dal-canada-la-idee-di-un-cjant-furlan-pai-taramotats-dal-centri-italie-e-cjante-la-coral-vocinvolo-direzude-di-lucia-follador/
https://www.lapatriedalfriul.org/musiche-la-musiche-furlane-inte-vos-dai-fruts/
◆ VocinVolo, al à un repertori impuartant e si misure cun grandis orchestris e su palcs impuartants, soredut in lenghe furlane, ma no dome. A àn vût un grant ricognossiment dilunc de pandemie, cuant che ducj i fruts a àn vude la idee di no fermâsi e di produsi istès musiche in linie, cuntune cover dai U2, condividint par dut il mont il lôr progjet.
◆ A prestâ lis lôr vôs blancjis a son une cincuantine di fruts e frutis dai vot ai vinc agns, che insiemi a àn fat concierts in dut il Friûl e vint diviers premis. Tra i tancj, al “1n Festival des vôs dal Friûl” (Fruts Furlans) e al “4t Concors Internazionâl di Palme”. Artiscj dal panorame nazionâl e internazionâl a àn vût mut di colaborâ cul côr, sedi in esibizions dal vîf che in tancj albums. Compositôrs impuartants come Orlando Di Piazza, Valter Sivilotti, Stefano Procaccioli, Virginio Zoccatelli a àn scrit e rangjât pal côr furlan.
◆ La compagnie e je stade invidade plui voltis tant che ospite di events sociâi e di beneficence, come “Telethon”, “Solidalinote”, “Un sorriso per Mattia”, “Voci senza Confini” (un progjet di solidarietât tra Irlande e Friûl). I fruts a àn ancje vût l’onôr di jessi invidâts ae cerimonie di scree de “30me edizion dal Mittelfest” di Cividât e, tal Otubar 2022, a àn cjantât al “GO! 2025” inte place de Transalpine di Gurize, Gnove Gurize capitâl de culture 2025, denant dai Presidents Sergio Mattarella e Borut Pahor.
◆ Il côr Vocinvolo al à za regjistrât doi discs: “Merry Christmas” (2015) e “A Christmas With Friends” (2018) e al è produsût de etichete discografiche “Artesuono” di Stefano Amerio. Scoltait e cjalait il nestri imni: https://youtu.be/-FkRiIS9hqo e lait daûr de pagjine di http://vocinvolo.ritmea.it par stâ inzornâts sui prossims apontaments. ❚

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +