Nino V. Rodaro (Nin dai Nadâi), Furlanadis, Udin, 2004

“Chest an, pe ocasion de fieste di Sant Lenart, patron de glesie di Cjavalì, il Circul Culturâl di Cjavalì Doi mil al burìs fûr e al presente chest librut che e je une racuelte di strichis, vignetis, pipins, in cont di avigniments, di situazions, di acjadiments capitâts in Friûl e pal lentintôr. E chestis situazions di croniche minude a son stadis comentadis, ilustradis e metudis sù sul mensuâl “La  Patrie dal Friûl” jenfri i agns dal 1998 al 2004.”
◆ La jentrade dal President dal Circul, Maurizio Petrei, e conte za dut su cheste publicazion di un centenâr di pagjinis. La presentazion di Antoni Beline e zonte un di plui di cualitât: i scrits di pre Toni a son simpri gjoldibii (culì al spieghe parcè che in Cjargne a clamin il predi siôr Santul). Ogni pagjine e je insiorade di une vignete dissegnade di Marc Urban che al somee divertîsi une vore a doprâ liniis gnervosis par dâur snait a siei omenuts o femenutis. Personaçs che a àn la incarghe di compagnâ lis batudis fatis di une o plui frasis fulminantis a coment di un fat di atualitât, di une mode, di une tindince: lis elezions cun tancj partîts, ma cun pôcs rivâts, la piçule Patrie che si domande cuale che e je chê grande, la Udinese che e mande i siei zuiadôrs (nancje un cracul di furlan!) a preâ a Madone di Barbane, la jentrade in vigôr dal euro, i mus di Feagne, Shinij Yamamoto il gjaponês professôr di furlan (cirî in rêt il so discors in furlan perfet ae inaugurazion dal fogolâr furlan di Tokyo), i falsaris di Palermo che ur cjapin la volte a di chei di Buie, i conseîrs regjonâi che si cressin la mesade, il pelavuac di mâr (ce robe ise? Lait a p. 37), il referendum li che si vote par alc, ma nol va sù nissun, la ore che e reste la sole robe legâl in chest mont, ma ancje chê seont lis stagjons (e inte vignete di Urban al è un tor cul orloi cui pîts par aiar, tant che chel di Buri), Friûl doc, la lenghe furlane a scuele e v.i. Insume une biele cerce di savietât popolâr presentade cu la muse di ridi, ma ancje cun marum pes tantis pecjis di cheste nestre ete. E ancje une ocasion par tornâ a butâ un voli disincjantât suntune dade de nestre storie resinte che nus veve lade fûr di cjâf. ❚