LETARIS – Sit com… infinide!

Claudia Brugnetta, regjiste de sede Rai dal Friûl-Vignesie Julie, e rispuint a proposit dal ERRATA CORRIGE: L’AUTOGRILL DI PAOLO PATUI di Oscar Puntel, «Friûl tal etere», Març dal 2009.
Visantmi in maniere esate des mês declarazions tal cors de interviste che mi à fate il vuestri colaboradôr e publicade tal vuestri numar di Novembar dal 2008, la frase «la idee e je stade propit de regjiste Rai» evidentementri (e in chest câs ancje in maniere corete) si riferìs al fat che Autogrill e je la prime «real-com furlane», apont di Claudia Brugnetta che – sui dialics e su lis storiis scritis inte prime part de pontade di Paolo Patui – e à ideât un gnûf format che al rivuarde no dome lis modalitât di riprese (vâl a dî telecjamaris fissis par incuadraduris fissis e cence nissune «panoramiche», daûr dal stîl des sit-com), ma che e à zontât pe prime volte inte storie dal gjenar «sit-com» apont, la «sogjetive» in moviment. E cun di plui e à ideât un gnûf format: la sigle di code «senegjade». Vâl a dî: finide la storie scrite di Patui (cuntune durade variabile di cirche 10/13 minûts par episodi), i 7/10 minûts che a restin di dute la pontade a son determinâts de sigle dal program. Che e je deventade, par ogni episodi, une altre mini storie pensade e volude de stesse regjiste e di mût che cui atôrs si sperimentàs, une volte stabilît un «canevaç», la art de improvisazion. Ve spiegât il parcè de definizion e il sens dal gjenar che pe ocasion al è stât tornât a batiâ in maniere ironiche di bande de regjiste «real – com», vâl a di une «comedie» sì, ma cun situazions «reâls», par vie che a son saltadis fûr sul moment de creativitât, de emotivitât e de sensibilitât tai siei aspiets plui comics dai stes atôrs e de regjistre che a ‘ndi è ancje autore.
Cun di plui, mi tocje vê indiment a cheste Testade che l’unic responsabil dal progjet (in chest câs televisîf) al pues jessi dome che il regjist che al aparten ae Aziende, designât pe produzion e pe realizazion di chel istès progjet di bande de stesse Struture Rai di competence.
Duncje il «responsabil dal progjet» come che o vês scrit inte errata corrige, nol è il siôr Paolo Patui, ma la siore Claudia Brugnetta, regjiste de Aziende Rai, Radio Television Taliane.
O cjapi la ocasion par ringraziâ di cûr dut il cast artistic di Autogrill (che jo o ai volût e direzût) pe grande gjenerositât e capacitât rimarchevule dimostradis ancje inte dificile art de improvisazion.
AL RISPUINT OSCAR PUNTEL:
O varès za pront il titul e i atôrs. Sì: daspò la ultime letarute rivade a chest gjornâl, mi è vignût iniment che o volarès produsi une sit-com. Si clamarà «Cjase Brugnui». Ven a stâ union di Brugnetta e Patui. Dute dedicade ae cuistion jenfri la regjiste de sede regjonâl de Rai, Claudia Brugnetta, e il regjist teatrâl e studiôs, Paolo Patui. Ducj e doi (autôrs?, responsabii?, pardabon no si sa plui ce peraule doprâ) si contindin la maternitât/paternitât de prime sit-com in marilenghe «Autogrill Friûl». Al jere Otubar dal an passât che i vin dedicât un articul che al diseve: «la idee e je stade propit de regjiste Rai». Duncje, si fâs sintî Patui: «La idee e il progjet a son miei». Alore o prontin l’errata corrige. Po cumò e scrîf la siore Brugnetta une altre volte… In sumis Brugnetta&Patui, cence savêlu, a ‘nd àn za scrite une altre, di sit-com: in onde su La Patrie dal Friûl.
Jo intant mi insumii une serie tivù cui miei doi gnûfs beniamins di «Cjase Brugnui». Li che si rebechin, si amin, si odein e si vuelin bon. I sucessôrs di Sandra Mondaini e di Raimondo Vianello. Version marilenghe. Ce biel dismovisi la domenie di buinore e gjoldisi, cit di cafelat in man, la gnove trasmissions de Rai pal Friûl-VJ.