Letaris ai furlans

Une des oparis plui bielis di pre Bepo Marchet a son lis “Letaris ai furlans” li che al fâs i pulçs e al sburte i furlans a jessi «parons di se stes». Ve chi une cerce. Un test che al manten dute la sô atualitât ancjemò cumò: e fevele di furlans che si… “intalianin”.
A UNE ZOVINE DI BUTEGHE
Siorute, o jeri un so aventôr, une volte: cuant che jê e veve di jessi rivade di pôc in chê privative. E o capitavi dispessut denant dal so banc, a dâi un cuc: un pôc parcè che o soi un cjamin simpri impiât e la sô buteghe si cjate a jessi su la strade che o  fâs ogni dì; e une vore parcè che, o dîs la veretât, mi plaseve di jentrâ… a sclarî il voli! Cence tristerie!
In chê volte jê e veve la musute come un pierçul nostran, i voi un fregul spaurîts, ma clârs e rampits come il cîl de Furlanie, e i vistiduts sclets e ben adatâts di tai e di colôr. Cu la int e veve un biel fâ, naturâl, premurôs e ancje sudizionôs chel tant che al pâr bon; e cun me, che o tacavi par furlan, e fevelave par furlan; chel so furlan di Sant Denêl, slis e vualîf che al pareve fat di misure par une fantaçute cussì.
(…) Ma al à bastât un an, par dissipâ dut. Un pôc in dì, ancje jê e à cjapade sù la ande di citadine; e à  imparât a sclarîsi la cjavelade, a segnâsi lis ceis, a infarinâsi la muse, a slapagnâsi i smursiei, i lavris, lis ongulis, a smenâsi… E pazience; fin alì a son afârs siei e cuistion di ideis.
Ma za timp, che o soi tornât a jentrâ une altre volte, mi à tocjât di sintîle a rispuindi cun malegracie,  e par talian, a une vielute che i veve domandât alc par furlan; di viodile a fâ la sostignude tant che une baronesse cuntun frutat di paîs che, dopo dut, no i diseve nuie di  mâl; e a sbraçâsi a fâ bocjutis e smorfieçs a un spucet di uficiâl sarasin che le complimentave cul picet. E alore o ai fate la crôs che no metarai  pît mai plui te sô buteghe e o cirarai di tignî lontans ducj i miei amîs.
Anzit, che e viodi: mi è vignude sù une pensade: di implantâ, culì a Udin, une gnove massonarie comerciâl, tra furlans, che a vebin di obleâsi a no spindi un crût tes buteghis indulà che no cjatin il rispiet che al si merete un bon furlan, in Furlanie, cuant che si compuarte di bon furlan. I rineâts  di cualunche sete no capissin altre lezion che chê di tocjâju tal tacuin!
E jê… Diu lu vueli che e puedi cjatâ daurman un frusin, disponût a menâle vie lontane: si visarà dopo…
(Patrie dal Friûl, 1950) ❚
✒ Josef Marchet