LETARIS. A proposit di Sedean

Preseade Redazion,
mi clami Danilo Moro e come che di sigûr bielzà o savês, o soi un abonât dal vuestri periodic par trê motivazions che mi sticin no pôc: prin, si tabaie di pre Toni Beline, duncje parcè che tancj dai vuetris colaboradôrs a son int dal grop di Glesie furlane e, no par ultin, parcè che o doprais la mê lenghe mari: il furlan.
Dit chest o rivi a la cuistion: tal articul intitulât “Sedean caput mundi” a firme di Margherita Timeus, al conte che chest comun dal Friûl di Mieç al è stât une scune di personis, tantis ancjemò in vite, che a àn dât sflandôr a chest paîs.
Di nissune bande si lei che cheste liste di personaçs e je incomplete e di conseguence juste indicative: cualchidun al è restât fûr. Un par ducj gno cusin Gianfranco Plenizio e so pari Leandro di San Laurinç che, tal cjamp musicâl prin di dut, a àn dit alc.
Mi pararès just che par taponâ la buse e comedâ la cuistion, o fasessis un articul dedicât a chescj 2 oms. Ce disêso?
Mandi
Danilo Moro
Codroip ■
_________________________________
Preseât Diretôr,
in riferiment al articul da La Patrie dal Friûl “Sedean caput mundi” a firme di Margherita Timeus o vuei ricuardâ che tra i nons di plui o mancul innomenâts personaçs, nassûts in comun di Sedean ripuartâts de gjornaliste, a mancjin tantis altris personalitâts che o ai podûts cognossi in maniere direte e indirete e che o volarès ricuardâ:
1. CLABASSI Plinio, nassût a Grediscje, cjantant liric. Il gnûf teatri, di pôc inaugurât, al puarte il so non;
2. DONATI pre Plinio, nassût a Grediscje, ricercjadôr des lidrîs e de identitât culturâl de comunitât di Grediscje;
3. PLENIZIO Gianfranco, nassût te piçule frazion di Sant Laurinç, musicist. Al è autôr di colonis sonoris famosis;
4. PRESSACCO Gianni, nassût a Turide, anime di tantis iniziativis a pro de comunitât di Sedean e autonomist convint;
5. RINALDI pre Carlo, nassût a Sedean, storic, autôr di cetantis publicazions su la storie dal Comun.
Mandi
Masutti Luigi
Sant Lurinç di Sedean ■