LETARE

PAR GALLIANO
Nus à lassâts di resint Galliano Zof, poete, studiôs e rercjadôr, insegnant e dirigjent di scuelis. O vulin memoreâlu in cheste maniere.
Si che duncje, in chest infogât Istât, tu sês lât vie, Galliano. Cumò mi è facil dî, cul poete, che tu jeris un rôl cussì grant, cussì bon. O volevi dîtal di cuant che ti vevi cognossût, ma nô o sin fats in chest mût: i sentiments par un pudôr atavic, no ju pandìn mai tai moments juscj. Però une robe o ai voie di dîti: lu pensavi di simpri, cuant che o leievi lis tôs poesiis, cuant che ti scoltavi, cuant che tu mi stavis daûr, come l’om savint al compagne il so arlêf.
In chescj ultins timps ti viodevi om dai nestris dîs, torzeonâ in altris monts lontans e cidins, a cirî une comunicazion cui spirts, lis animis, i oms in cjar e vues pleâts su la tiere masse basse, fontanis vivis,  strafonts di sudôr.
Tu tornavis tai tiei dîs cun la memore plene di imagjinis, di fantasimis, di mîts, flabis e leiendis e di crodincis.
Tu mi contavis di chel mont che tu vevis  esplorât, tes lungjononis telefonadis, tai incuintris che o vevin daspò cualchi manifestazion culturâl e te ombre dia arbui “pur grandi, pur buoni” dal zardin in face dal palaç dal vescul di Udin.
E jo, inalore, o imagjinavi impressionantis processions di muarts che a tornin culì, chi di nô, a domandâ la nestre aghe te gnot dai Sants; la viele discolce, plete, che e leve a cjapâ sù la tiere benedete e sacrade de ancone dedicade ae Madone, dulà che e veve preât, platâle te sachete dal grumâl e puartâle a cjase par tignî lontan lis disgraciis; i claps maledets ingrumâts te cassele de strie platade sol il so jet.
E i contadins o viodevi, i sotans, i colonos.
E jere une zornade di soreli e i ucei a cjantavin tes cjarandis.
La manute di un frute inocente e robà doi raps di ue e tu, par chê colpe, puar disgracjât sotan, tu ti cjataris, inviluçât te fumate di Sant Martin e jenfri i arbui crots, suntune strade, cence cjamps, cence cjase, parcè che i siôrs… a son siôrs e i puârs… a son puârs.
Graciis Galliano di dut chest e di alri inmò e ti promet, se Diu mi dâ la salût, che o fasarai ce che tu, cun vôs flevare e flape, tu mi âs domandât di fâ.
Guido Sut