L’EDITORIÂL – Politics furlans imparait dai triestins

Cjatâsi par fâ fieste e je simpri une biele robe, ancjemò di plui se ator si sint fevelâ par furlan e se cualchi acuilute e svintule tal aiar. Friûl doc, tant criticât, al reste simpri une fieste de furlanie. No lu dîs par vie che la Patrie e à fat un sfuarç no indiferent par jessi presint a cheste edizion, ma dome parcè che e je la veretât.
Gjoldìnsi duncje un sclap di ligrie, ancje se no ’nd è tantis di buinis par jessi fiduciôs.
Soredut cheste ultime novitât su la provincie di Gurize, che il guvier regionâl al somee vedi decidût di meti dongie a chê di Triest. Puars noaltris se e fos vere, cussì sì che si sarès dal gjat, cemût che al diseve pre Checo Placerean, cuntun Friul ancjemò plui dividût e sotan di une provincie “giuliana” slargiade e plui fuarte, cence nancje un piçul cuintripês in regjon. O sperìn dome che i governants di Gurize, une buine volte, a capissin che il doman al è dome il Friul e no jessi “massarie” di Triest.
No par ruvinâus dal dut la fieste, us metìn ancje sul plat lis ultimis gnovis che a rivuardin la marilenghe: bêçs pal insegnament tes scuelis no ‘nd è, il regolament aprovât al è plen di busis dal pont de didatiche.
E il tentatîf di no ricognossi i credits pes graduatoris a chei che vevin  fat il master, al jere propit une vergogne.
O vin simpri savût che nissun nus varès regalât nuie, ma chest tirâ di lunc al somee plui une cjapade pal boro. E i nestris sorestans cidins.
O sberlìn tant cuintri di Triest e invezit si varès di fâur tant di cjapiel ai siei politics.
Tal ultiin consei regionâl, intant che al leve indenant il dibatiment sul belanç, il conseîr triestin Camber al scriveve su Facebook ducj i bêçs che a stevin decidint di dâ a Triest: no i freave nuie dal belanç regjonâl, dome di trop che al rivave ae sô citât, ai siei eletôrs.
Une prove di plui di cemût che i triestins a fasin ben i lôr interès: un milion di euros al larà par meti gnûfs assensôrs tai vecjos condominis. Par vê il contribût al jere un concors. A son stadis fatis buinis 27 domandis. Savês tropis che a son di Triest? 26.
E i rapresentants furlans invezit a àn cjatât il timp par barufâ tra di lôr sui bêçs pal Museu di storie naturâl a Udin.
Dulà volêso che o lini cun cheste int.
DREE VALCIC