L’EDITORIÂL – Friuli doc cence acent al reste dome une biele sagre

Friuli doc, scrit cussì par talian. Cuale ocasion miôr par un resonament sul nestri mût di cjalâ lis robis ator. Ma parcè propit Friuli Doc, e la mancjance di traduzion e je volude, par pandi cheste curiositât? Par une serie di motîfs. Il prin e il plui sempliç parcè che si cjate tante int e chest la dîs lungje su dutis lis critichis, la puce sot dal nâs, che tancj di lôr, inteletualuts in gjenar, a mostrin pe manifestazion. Il lôr slogan, par segnâ la diference, lu ai sintût chê altre dì: «Pordenone legge, Udine beve». E vie indevant cuintri la sagre dai cjochetons, al provincialisim che al sarès daûr de stesse. Po dopo magari a contin ai lôr amîs ce biel che al è passâ doi dîs al Oktoberfest di Monaco.
Ma a la int invezit Friuli doc, simpri no tradusût, i va ben cussì: une maniere di cjatâsi, ancje une sorte di svant par podê mostrâ al turist la robe buine di cjase nestre, la origjinalitât de nestre produzion. E scusait se al è pôc in timps dulà che ancje il Tocai al à scugnût voltâ il non.
Dit chest, vadial ben duncje cussì? Nancje pal doi di cope al va ben cussì. Chest juste apont al è Friuli doc, ma a noaltris nus plasarès che al fos «Friûl doc» cun chel circonflès che al fâs la diference.
No son robis di pôc cont i segns te scriture. Visaitsi dome cun ce segretece e vuate che a àn gjavât chê liniute tra Friuli e Venezia Giulia: e jere restade la ultime trincee istituzionâl par ricuardâ a ducj che la Regjon e jere costituide di dôs realtâts diferentis, il Friûl e Triest. E invezit intune comission parlamentâr, par iniziative di un onorevul di chenti, ma dacuardi ducj i partîts, la liniute e je svolade vie e cumò, in barbe a chei che a disin che la Costituzion no si pues cambiâ, no sin plui la realtât che propit i paris de Costituzion stesse a vevin decidût, ma une altre robe miscliçade, contraditorie, sbaliade, cence che nissun al vedi il cûr di dî alc cuintri.
Dificil tornâ indaûr des peraulis scritis, e cussì al vâl par Friuli doc che cul passâ dai agns al à pensât plui a la panze che no al cerviel.
Cence culture, cence cussience un toc di purcit al reste un toc di purcit in ogni bande dal mont. La diference e sta tal rapuart che un popul, par tradizion, par clime, par credince religjose, par mîts e liendis, al à cul gustâ, cul prodot de tiere, ma ancje cul stes lavôr: in sumis, cu la nature e la sô trasformazion.
Di dut chest al è dificil cjatâ olmis tra stands e bancuts, ma soredut impussibil pretindi che cumò a zontedin ce che a àn gjavât.
Jessi duncje a Friuli doc al è come picjâ tul mûr di cjase une riproduzion o un cuadri fals. No vûl dî che in chê cjase no tu cjatarâs un bon acet o che no tu starâs ben in compagnie dai siei parons o che il vin nol sarà bon.
Il dubi al è che forsit no le contin juste, o dute, ti restarà sul stomi.
Ma parcè i Furlans varessino di picjâ copiis, cuant che a àn tancj brâfs pitôrs?
DREE VALCIC