Sfuei Mensîl Furlan Indipendent
Archivi de Patrie

L’EDITORIÂL – Achille Tellini e i rapuarts interladins

............

Il prin di Otubar stât a son colâts juste i setante agns che al è muart Achîl Telin (par talian, Achille Tellini), naturalist, gjeolic, folclorist, esperantist, sagjist, docent a Rome, ma soredut grant sostenidôr de idee di une Patrie Ladine comune di Cuere a Gurize, o sei di une Patrie che e varès vût di cjapâ adun i ladins rumançs dal Cjanton svuizar dai Grisons, chei de Ladinie des Dolomitis e chei dal Friûl. Une utopie che e à daspò cjatât prudêi in furlaniscj tant che Felix Marchi, Josef Marchet, Dino Virgili, Etalrêt Pascul, Riedo Puppo, Celso Macor, Zuanfranc D’Aronco e soredut Agnul M. Pitane.
Achille Tellini al nas a Udin tal 1866 e al mûr simpri tal cjâf lûc de Furlanie tal 1938. Om di inzegn e di grande inteligjence, al è il fondadôr dal Circul speleologjic furlan (1897). Al à al so atîf un grant numar di publicazions sientifichis. Tra lis altris cjossis al scrivè di morfologjie, su lis aghis che a scorin sot tiere e sul clime des Alps di soreli jevât; al prontà une cjarte gjeologjiche di Rome. Si interessà po al esperant, deventant un cultôr e un propagandist di cheste lenghe francje internazionâl; in fin si passionà, cun fede di apuestul, di culture, di lenghe e di tradizions dal Friûl. Chest so impegn al puartà, dal 1919 al ‘23, ae publicazion in autografie di Il tesaur de lenghe furlane, un racolte di 826 pagjinis dulà che o cjatìn dentri la plui ricje racolte di vilotis furlanis che si cognossi: Spieli de anime furlane o leterature popolar tradizional de Çarne e dal Friul, racolte integrade plui indenant cuntune Zonte a lis vilotis.
Dut câs, dal pont di viste politic culturâl la opare plui significative e je La Patrie ladine. Riviste pal Friul, Çarne, Dolomitis dal Adis e Canton Grison (288 pagjinis, in part a stampe, publicadis a scomençâ dal mês di Mai dal 1921), dulà che al propon il so grant insium dal ricognossiment de dignitât de lenghe furlane, dal ûs de bandiere ladine (che e je celeste, verde e blancje), e dal tornâ a meti sù il Patriarcjât di Aquilee sicu model par un stât furlan indipendent. Inmò, dal 1929 al 1933 al publicà la riviste Archivis de leterature furlane antighe e moderne. Tal inovâl dai cincuante agns de sô muart, la Union Scritôrs Furlans e à poiade une lapide su la façade de cjase, di Udin, dulà che al è nassût. Parsore si pues lei: In ta chest lûc al è nassût Achille Tellini, sienziât, campion di furlanetât, profete dal risuriment dal Friûl e de Patrie ladine.
Al merte inmò sclarît che i agns che Achille Tellini si cjatà a davuelzi la so azion politiche e culturâl a jerin chei no facii dal fassisim e dal nazionalisim plui afanôs. Si pues cussì imagjinâ che ce che lui al scriveve e al diseve a jerin consideradis cjossis fûr dal vade, si cjatà cussì, prin aviersât in maniere ferbinte, po, ancje par vie che al jere indenant cu la etât, si cambià tatiche e si scomençà a meti fûr la vôs che al jere un che nol jere just cul cjâf. Naturalmentri al jere dut fals, ma intant il nestri patriot si cjatà simpri plui isolât, anzit dibot di bessôl.
Par chel che al inten i rapuarts interladins, ven a stâi jenfri i diviers grups ladins, ce che al veve semenât Telin al scomençà a butulâ daspò la fin de vuere. Si sa, almancul di ce che al contave Riedo Puppo, de presince di scritôrs dal grup di Risultive a cunvignis ladins intes Dolomitis. Cundut achel un impuartant pas indenant al vignì fat daspò il taramot dal 1976, soredut par mert di Agnul M. Pitane (1930-2005) e di Lois Craffonara. Agnul, scritôr e poete furlan di Sedean di Codroip, che al viveve e al lavorave in Svuizare, al ve venti vie mût di intiessi rapuarts di amistât e di colaborazion cun scritôrs rumançs e cu lis istituzions ladinis come la Lia Rumantscha.
Fondamentâl su chest cont la sô colaborazion cul sagjist Werner Catrina, autôr dal saç I Retoromanci oggi – Grigioni, Dolomiti, Friuli. Agnul, juste apont, al curà la part che e rivuardave il Friûl. Impen Lois Craffonara, ladin de Val Badie, al è stât il fondadôr (tal 1977) e par passe cuindis agns diretôr dal Istitût Ladin Micurà de Rü, che al è logât a Sant Martin de Tor in Val Badie. In cheste sô vieste, al coinvolzè simpri il Friûl e i scritôrs furlans intes iniziativis dal Istitût che al rezeve. La testemoneance di cheste sô fuarte volontât di prudêl dai rapuarts tra i grups ladins le cjatin inte antologjie che al à curade e po publicade tal 2003: Flus Leterares dl Grijun y dl Friûl – Poesies tla traduzion de Lois Craffonara, dulà che si cjate dentri poesiis di autôrs dal Friûl e dai Grisons, voltadis tal ladins dolomitan di Craffonara. Cheste e je pardabon une opare fondamentâl, penze 463 pagjinis.
Rivant ai agns plui resints, no podin no vê iniment la “Fieste Ladine dal Friûl” di Sant Denêl. Une iniziative ancje cheste che e smire a clamâ adun i ladins dal Friûl, des Dolomitis e dal Grison. Rivade ae cuarte edizion, cheste fieste e je nassude soredut par mert dal assessôr M. Grazia Lanzoni, dal sindic Pascolini e dal diretôr de Biblioteche Guarneriane dot. Carlo Venuti. Al è dabon di sperâ che e puedi lâ indenant, ancje se a ‘nd è plui di cualchi preocupazion sun chest cont. Par esempli, chest an ae fieste indi vin viodûts pôcs di sorestants. Inmò, inte vierte cu ven si davuelzaran lis votazion comunâls, cussì al ven di domandâsi se cui che al sarà clamât a rezi il comun di Sant Denêl al varà cûr di puartâ indenant cheste biele esperience. Sperìn propite di sì, magari dedicant la cuinte fieste dal 2009 al studi de figure e de opare di Achille Tellini.
Renzo Balzan – dean de Union Scritôrs Furlans, diretôr di “Ladins dal Friûl”

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +