Leç pe editorie Une vergogne dute nostrane: rapresentants che nancje a vierzin la bocje

«No si pâr bon a pensâ mâl, ma dispès si finìs par vê reson» al diseve Giulio Andreotti, che di politiche le saveve lungjonone. E ancje se no si pâr bon a lamentâsi simpri, il disinterès dai politics nostrans pai temis de lenghe furlane, de sô tutele e valorizazion, al fâs pardabon pensâ mâl dai nestris rapresentants e nol pues passâ intal cidinôr gjenerâl. Se za in sede di discussion de convenzion cu la Rai la marilenghe e jere stade “dismenteade” e tratade tant che une lenghe di serie B, il fat al è tornât a sucedi inte suaze de discussion de leç su la editorie. Un proviodiment dulà che si leve a meti dongje un Font pal pluralisim e pe inovazion inte informazion, che al covente a poiâ chei imprescj di comunicazion che no staressin sul marcjât di bessôi. Jenfri di chescj, a son gjornâi, radio e televisions in lenghe todescje, slovene, francese e ladine, ma no chei dai furlans come noaltris. Une vergogne, stant che la Costituzion e la Leç 482/99 no fasin nissune diference jenfri lis lenghis mancul pandudis che a àn di jessi prudeladis e judadis dutis.
Ma la vergogne no sta dome intal guvier talian che nol rispiete lis leçs dal Stât che al guvierne. E je ancje une seconde vergogne, dute nostrane: che di vê rapresentants che no son stâts nancje bogns di vierzi bocje sul teme. I sarts a àn fintremai fate une bataie presentant un emendament par cambiâ il proviodiment a pro de lôr lenghe, e cuant che la maiorance lu à refudât, in Sardegne a son vignûts jù ducj i sants dal Paradîs.
Invezit i furlans cidins, par pôre di movi pucis: ancje se la slovenofone Tamara Blazina e à fevelât dal Primorski Dnevnik, nissun altri deputât de Regjon si è mot par segnalâ la presince di sfueis o radios che a doprin la lenghe furlane. E cussì, la robe e riscjave di restâ platade, se nol fos stât il president de Assemblee de Comunitât Linguistiche Diego Navarria a denunziâle. Lui al è stât in vuaite, intant che i nestris parlamentârs a durmivin. Par trop ancjemò scugnarìno gloti dut chest disinterès pe nestre lenghe di bande di chei che o vin sielzût tant che sorestants? ❚
✒ Walter Tomada