L’aur de mont, robât dai forescj

Tachìn dai numars, crûts e impressionants. Dome in Cjargne, in dì di vuê a son in funzion plui di setante derivazions idroeletrichis. Trentesiet a son di Enel, e di chês, trentecuatri de ex Sade che a fasin riferiment a doi elefants: lis centralonis di Dimpeç e di Samblâc. Po dopo, sîs lis dopre la Comunitât montane, dîs la Secab di Paluce, sedis a son di privâts, une comunâl.
Dut chest sfrutament de aghe, “l’aur de mont”, si tradûs in plui di otante chilometris di flums in secje. Il Dean, par esempli, al à pierdût il 70% de sô aghe, il Tiliment il 40%.
Fin chi, la fotografie inzornade che e met za in lûs cemût che la mont e sedi deventade un “gruviere”, cence però fâ la fortune de sô int. Di fat, gran part de produzion energjetiche di chestis centralinis e je vendude sui marcjâts forescj, e ai comuns cjargnei ur torne te sachete dome la cuote dal Bim, che a son fruçons rispiet aes palanchis che si vuadagnin Enel, Edipower e vie discorint. No bastassin chestis bastonadis che o continuìn a cjapâ, su pe grope a podaressin rivâ altris tons: in Regjon a son in spiete di autorizazion plui di un centenâr di richiestis di gnovis derivazions pal idroeletric, la maiorance presentadis di societâts forestis che a vuelin continuâ a fâ business su pes nestris spalis. Juste par fâ cualchi esempli, tal comun di For Di Avoltri in dîs a stan spietant il vie libare; stes discors a Resie, cussì come a Trasaghis. E la robe plui preocupante e je che une part di chestis domandis a vegnin fatis dome par speculâ, cence une reâl volontât di implantâ une centraline ma par cjatâ un compromès cui concorints in buine fede, cussì di tratâ e di vuadagnâ parsore cence movi une fuee. Ve parcè che di diviers agns a cheste bande, comitâts, associazions ambientalistis e comuns a stan pressant la regjon par che e meti man ae leç, in maniere di fissâ palets e di fermâ la corse dai speculadôrs. Un prin pas si lu à fat cul ultin Plan di tutele des aghis, che almancul al à tacât a fevelâ di aumentâ il nivel dal minim deflùs vitâl pai flums, vâl a dî la aghe cjapade a mont de centraline che po dopo e à di jessi molade a val dal turbinament. Ma nol baste, al vûl lât indenant. In chest si inserìs il dibatit, che al sta interessant dut l’arc alpin, sul idroeletric tant che font rinovabile: no si pues di fat continuâ a pontâ su chest gjenar di energjie in maniere indiscriminade, a coventin frens. Ancje parcè che cu la tecnologjie che e cres di an in an, si è rivâts a capî cemût sfrutâ in maniere utile e rimunerative ancje la aghe dai acuedots, midiant i salts di cuote des condotis che a partissin dai fontanons. Stes discors al vâl ancje pai cjanâi agricui.
Alc si sta movint, e ancje in Cjargne un pâr di comuns a stan progjetant chescj intervents.
Ma ce che al mancje e je une vision e une vuide gjenerâl pal sisteme energjetic dal Friûl, che al continue a subî cence reagjî. E al à fat ben il sindic di Rigulât Fabio D’Andrea a fâ notâ che la vere partide de autonomie regjonâl si zuie su cheste cuistion: “Cence la fuarce di une economie nostrane – al à spiegât dopo i problemis patîts cui blackout dal Invier – cemût pretindìno di alçâ la vôs viers Rome? Se no tachìn a difindisi dai concuistadôrs forescj rispuindint cun impresis furlanis, managers furlans, bêçs furlans, o sarìn destinâts a deventâ sucursâl in dut e pardut”.
E cuale fuarce, plui de energjie, podaressie permeti aes nestris impresis di jessi competitivis su ducj i marcjâts, oltri che favorî la nassite di gnovis aziendis? Par chest, un lotadôr come Franceschino Baraçut, storic sindic dal taramot e anime in dì di vuê dai comitâts cjargnei, al continue a batile su une bataie di puartâ indenant a la muart: “Al covente che la regjon si fasi la proprie societât energjetiche publiche – al spieghe – metint adun ducj i produtôrs locâi di energjie, i comuns e lis cooperativis come la Secab de Val de But, la Idroeletriche di Fors Disore o de Valcjanâl. Preparâsi po dopo a comprâ lis concession idroeletrichis in man ai forescj, che a partî dal 2020 a tacaran a scjadi come in Val Tramontine. E tal stes timp, cuntun sfuarç economic che al sarà dut câs ricompensât tal timp, e à di lâ a fâsi cedi de Enel o de Terna i pilons e lis liniis de alte tension. In Trentin – al fas notâ Baraçut – a stan dimostrant che chest progjet al funzione e al puarte beneficis a dut il teritori. Parcè nô vino di fâ simpri la part dai monis?” ❚
David Zanirato