L’archivi de memorie di Checo Comel

De ex Avf di Nimis gnovis publicazions dedicadis aes memoriis di politiche linguistiche, aes predicjis di pre Bepo Marchet, e a cjantis e detulis furlanis. Checo Comelli, fondadôr e gjestôr par tancj agns de etiche discografiche storiche Afv nassude a Nimis tai agns Setante, al à publicât di resint trê gnovis golainis di Cd: la prime e met dongje 13 discuts dulà che il professôr Adrian  Cescje al conte la storie des politichis inviadis dal Moviment Friûl par disponi leçs indreçadis a salvâ la lenghe furlane, in maniere che e ves une sô politiche linguistiche come che le àn dutis lis lenghis ricognossudis. Comel al à lavorât ancje ae publicazion di 3 Cd cun musichis e cjantis furlanis sielzudis dentri di un arc temporâl di 500 agns, che a fasin part dal archivi Afv: si va dai bai di Mainerio aes vilotis popolârs e di autôr, par rivâ ae contemporaneitât, di Zardini fin a Straulino e Maieron, passant pai tocs di Dario Zampa. Ta cheste golaine al è ancje un Cd che al à dentri 184 proverbis e detulis furlanis. Infin, Comel al à ancje volût tornâ a publicâ i 6 Cd che a contegnin “Lis predicjis dal muini”, ven a stâi il test di pre Bepo Marchet. «Chestis publicazions – al à spiegât Checo Comel – no son fatis pe vendite. O ai volût esprimi la mê ricognossince viers il mont de furlanetât che in chescj 50 agns mi àn dât di vivi cu lis publicazions discografichis di musichis e cjants de nestre culture furlane. O dedichi chescj lavôrs a gno pari, depuartât tun cjamp di stermini nazist dulà che al è muart». Checo Comel al fondà la etichete discografiche Afv tai agns Setante dopo che al veve viert un studi di regjistrazion tal plan soterani dal so negozi di eletrodomestics a Nimis. Ta chel studi a son vignûts a regjistrâ cuasi ducj i autôrs, cjantants, e sunadôrs di musiche furlane, insiemi a tancj côrs di dut il Friûl. L’Avf e à dât fûr tancj discs fin ai prins 10 agns dal 2000 e po, cul evolvi de “musiche licuide”, e à scugnût sierâ. A Nimis e reste dut câs une grande colezion di musiche metude vie in ducj chescj agns. ❚