La vetrine di Friuli Doc

Une biele vetrine. Ma no dome par metisi in mostre, ma fâ cognossi, çerçâ e tocjâ pardabon ce che al è il nestri patrimoni: chest al è Friuli Doc, la plui grande e biele vetrine che o vin par fâ viodi ce che o sin bogns di fâ e di produsi intes nestris braidis e intai nestris paîs.
Aromai ogni an Udin al devente la capital dal magnâ e bevi ben furlan: intes viis de citât a nassin stands e bancuts che a metin in mostre ogni sorte di goloset: cjar, salams, formadi, e tant bon vin, chel che al ven fûr dai nestris vignâi…
Ancje chest an la Regjion e je presinte a Friuli Doc midiant di Ersa, che e a varà il so tendon intune des plui bielis placis di Udin: place Sant Jacum come l’an passât e deventarà “Tipicamente friulana”. No a câs si è siezude une sede come cheste… Place Sant Jacum e je la place storiche dulà che ducj i contadins a vignivin des braidis a puartâ in citât i lôr prodots, par vendiju al marcjât.
Insome, ancje pal 2011 e par chest grandiôs apuntament pal public dal Friûl e par ducj chei che a vignaran a viodi Udin e la sô fieste, la Ersa e la Regjon a àn volût rapresentâ inte miôr maniere pussibil dut ce che o vin di bon intal nestri patrimoni agroalimentâr, dai prodots e lôr produzion, ai leams che a son tra il lavôr tai cjamps e la voie di fâ e di produsi, e il teritori.
Chest, inte vision dal assessôr regjonâl aes risorsis rurâls, agroalimentârs e forestâls Claudio Violino, al rapresente la miôr maniere di “fâ capî ae int, in particolâr pai consumadôrs, la vere anime e la gjenuinitât des nestris produzions locâls. O vin di tornâ a puartâ tal mieç de int e tal mieç dal dibatit, ancje politic la agricolture”. Ma nol è dome chest: “Cognossi lis nestris lidrîs e soredut capî di dulà che o vignìn e cualis che a son lis nestris tradizions contadinis e ancjemò di plui, lis nestris tradizions alimentârs nol è un tornâ indaûr, ma al è un cjalâ indaûr par podê lâ indenant miôr, cuntune cussience in plui, dal nestri jessi furlans. Chest nol covente dome a la agricolture, ma al devente un model di svilup economic che al covente a ducj i setôrs”.
Cinzia Collini