Une opare soredimensionade
e cuntun grant impat
su lis comunitâts di uciei nidiants
Lis infrastruturis a son fondamentâls intune societât umane parcè che a permetin il passaç di personis, marcjanziis, energjie, informazions e vie disint. Lis stradis, che a permetin il moviment dai oms e des robis puartadis cun lôr ancje cun mieçs mecanics sempliçs (che si pensi ai cjars), a son une des formis plui vecjis di infrastruture. In Friûl, compagn che inte plui part de Europe, dai agns ’50-’60 dal secul passât si è viodude une proliferazion di stradis che a àn interessât massime lis planis e dopo, cemût che al capite cuasi simpri, ancje lis monts. Lis stradis, in plui di jessi une vie fisiche, a son ancje une des viis miôr par slargjâ il consumisim, sedi inte lôr realizazion (che e fâs bêçs), sedi parcè che a favorissin i traspuarts e che che ur stan daûr (cumierç, turisim e v.i.).
◆ La viabilitât fate sù intai timps modernis dispès e je lade daûr dal percors che al jere prin, ma intal passât, la viabilitât e jere condizionade a fuart de orografie. La strade statâl 52 Cjargnele e va ancje daûr di chest principi e, rivade a Soclêf, invezit di lâ indenant pal cjanâl dal Tiliment che si strenç a fuart e dulà che no son paîs par un biel toc (fin a For Disot), e monte sù viers chel dal Lumiei servint lis vilis di Soclêf e lant indenant bande Dimpeç. Chest i à dât Soclêf la innomine di “paîs là che il mont al fâs la curve” parcè che la strade rivant dal bas in place, là che e somearès continuâ (di fat tancj che no le cognossin a van drets) inte direzion dal cjanâl, e fâs une curve fuarte a drete lant viers la mont.
◆ Intun mont che al à di cori (ancje in gracie dal consumisim bielzà nomenât) e calcolant il fat che daurman dopo Soclêf la strade e lave sù par un toc cun curvis (“Criviel di Soclêf”) che a creavin pericui e problemis massime cul asfalt bagnât e, vie pal Invier, cun mieçs pesants che plui voltis a àn blocât la strade, cheste situazion e à fat nassi un dibatit fra chei che a jerin a pro di fâ un toc di strade che e lassàs fûr Soclêf e la frazion contrarie. Il dibatit al à durât desenis di agns e, fra chei che a volevin velocizâ la strade e minimizâ i pericui e chei che a vevin pôre che fasint passâ la strade fûr dal paîs chest al murìs, si è decidût a pro dai prins. Chest nol podeve jessi in mût diviers, parcè che in plui dal consumisim, al è il fat che lis decisions che a tocjin la mont a son cjapadis il plui des voltis lontan des monts, di int che no je di mont e, po dopo, in Italie di cuant isal che si interessisi, se no cun cjacaris, al fat che un paîs di mont al puedi murî? Clâr, se no tal câs che no si trati di cualchi paîs là che chei che a decidin o i lôr amîs a van in feriis.
◆ Al è cussì che al è partît l’iter par realizâ la cussì clamade “Variante di Soclêf”, là che, intant de progjetazion, al è stât fat un scandai preliminâr su ce che la costruzion e varès causât su ambient e speciis che a vivevin alì. Cheste indagjin e je stade fate di personis lontanis de Cjargne sedi dal pont di viste fisic che par cognossince, ignorant il savê dal puest (mancjarès altri che si vedi di domandâ a cualchi montanâr) e lis evidencis sientifichis di che che al jere a disposizion intai studiâ fats inte zone. Il risultât al è stât un document che al veve pôc sens e che al valeve pôc e nuie.
◆ Di bande de progjetazion, invezit, al è stât fat un soredimensionament massime dai svincui che, dut câs, sigûr al à permetût di movi plui bêçs.
Fâ sù o modificâ stradis al à efiets sui animâi, cemût che o vin bielzà viodût par ce che al tocje i anfibis e i retii (v. “La Patrie dal Friûl” di Novembar e di Dicembar dal 2022).
In chest câs l’autôr al à volût valutâ, cul metodi sientific, l’efiet su lis comunitâts di uciei nidiants. Il studi, a diference di ce che par solit al ven fat a nivel sientific, dulà che si studie l’impat une volte che la strade e je stade fate, al à tignût in considerazion il periodi prin che a tacassin i lavôrs (cuant che la aree e jere un bosc), vie pe costruzion e a lavôrs finîts. Par fâ chest, l’impegn al è stât une vore plui grant sedi par vie de dade di timp plui lungje, sedi par l’impegn metût intal studiâ e intal aplicâ une metodologjie che e les ben in diviersis situazions, par vie dal cambiament ambientâl in consecuence de realizazion da strade.
◆ Chi sot, in struc, ce che al è saltât fûr dal studi:
- Il numar di speciis che al jere 29 (prin de costruzion) al è calât a 24 (-17,24%) (intant) a 21 (-27,59%) (dopo).
- La abondance (numar di individuis par chilometri) e je passade di 91 a 70 (-23,08%) e da pît a 45 (-50,55%).
- Dopo che e je tacade la costruzion da strade grande, une part des speciis no je stade contatade o e je stade contatade cuntune abondance inferiôr.
- La diversitât dai uciei e je lade man man calant e il numar di individuis al è lât a concentrâsi in mancul speciis.
- Lis speciis in comun fra i diviers periodis a son diminuidis in mût graduâl vie pe esecuzion des oparis.
- Diviersis speciis forestâls, par esempli il pic vert Picus viridis e il sivilot Pyrrhula pyrrhula a son stadis cjatadis dome prin de costruzion de strade. La dordine Anthus trivialis e je stade contatade dome vie pe realizazion, invezit il smaiart Emberiza citrinella dome a strade finide. La çore Corvus corone e je stade rilevade dome intant e dopo la costruzion.
- E je stade dimostrade une plui grande diference fra lis comunitâts di uciei prin e vie pe costruzion che no intant e dopo, a indicâ che l’impat si è verificât bielzà inte fase di realizazion e si evidenzie ancjemò di plui cuant che la opare e je ultimade.
- La comunitât dai uciei e à patît par vie de viertidure a de framentazion dal bosc, diminuint la presince di speciis sensibilis e cambiant la sô composizion viers speciis plui gjeneralistis e oportunistis, che a son leadis mancul a strent cui ambients forestâi; al è ancje stât verificât ancje l’ingrès di speciis che a vegnin di ambients vierts e semivierts.
- Da pît: i varis parametris calcolâts a àn evidenziât une semplificazion de comunitât dai uciei midiant une sô modificazion sostanziâl. In chest, il mudament dal habitat al à vût un pês plui grant rispiet al rumôr provocât dai veicui viodude la categorie di strade, che no je urbane cun miârs di veicui di passaç par dì.
◆ La costruzion de “Variante di Soclêf” no à incidût dome sul ambient e su lis speciis che lu caraterizin ma, ancje se in mût indiret, ancje sul savê de comunitât umane e sul furlan. Di fat, il svincul che al è fra Soclêf e Viâs al à interessat une zone rurâl clamade “Lavoris” e, le à scancelade. Cumò cheste localitât no esist plui e e je stade gjavade sedi ae agriculture che al savê de int. Si stan bielzà dismenteant ducj i nons dai lûcs par furlan e i intervents sul ambient a contribuissin a chest. Bielzà cu la prime variante ae vecje strade (fate intal secul passât) e jere stade gjavade la “voltade grande”, di sot di Soclêf. Cun di plui, il viadot che al passe parsore a ce che al jere un timp “Lavoris” al è stât clamât “Crivel” (duncje cuntun non che nol jentre), cemût che al è clamât dai dimpecins il toc di strade fra Priûs e Dimpeç e no, tal câs, “Criviel” cemût che al è clamât dai soclevins (che si viodi parsore).
◆ Par traviersâ l’unic cors di aghe, il riu Filuvigne, al è stât fat sù un puint che si zonte a chel de vecje statâl e a un altri ancjemò plui vecjo: cumò o vin trê puints un dongje di chel altri.
Te pratiche no je stade fate nissune opare par limitâ l’impat dal trafic sui animâi e chel pôc che al è stât fat al è indreçât, in sostance, dome a mamifars di taie medie grande. Nuie al è stât proviodût par chei altris animâi.
◆ Ancjemò une volte, pe realizazion di une opare fate cui bêçs di ducj, lis decisions e la progjetazion a son stadis metudis adun lontan dal puest di costruzion (duncje cence esperience direte), no doprant il savê dal puest e lis cognossincis a disposizion e cul fin di movi il franc. Lis consecuencis de realizazion a son stadis minimizadis.
◆ Vê doprât areis rurâls e il consum di teren in zonis di mont penalizadis de orografie al larès valutât cun sensibilitât massime tai câs di infrastruturis “secondariis”, tant che svincui che a servissin paisuts di pôcs centenârs di personis.
◆ Al bisugne ancje dî che, aromai, la distance de plui part des personis dal mont naturâl e de impuartance fondamentâl di chest su la vite ancje dal om al fâs pierdi il vêr sens di ce che la costruzion de “Variante di Soclêf” e à provocât. Di fat, une des considerazions plui comuns e je che “a àn sassinât une val interie”m intindint cun chest che al è stât ruvinât il paisaç tal sens di ce che al viôt l’om. Cheste, però, e je une cuistion estetiche che no à nuie a ce fâ cu la puartade reâl di ce che al è stât fat e dal so impat.
Ce che al è vignût fûr dal studi al mostre che al è necessari fâ une valutazion preliminâr scrupulose dai intervents, doprant la cognossince bielzà in jessi, par ridusi al massim i efiets negatîfs tarant lis oparis su la fonde dal contest ambientâl e evitant, tant che tal câs descrit, il soredimensionament. ❚
