Daspò di La ultime puarte, (segnalât intal premi S. Simon dal 2003), Mizzau al propon cheste contelungje che e je stade, ancje chê, segnalade inte edizion 2006 di chel stes premi. Le publiche pes edizions SilvanaEditoriale cu la traduzion par talian in rimpet (ven a dî che lis pagjinis disparis a son par furlan e chês pârs par talian), curade di Barbara Cinausero. Al risulte un librut di 108 pagjinis, ven a stâi 54 par furlan e ancje tantis par talian. A gno mût di viodi, se il libri al ves vude une pagjine di mancul, scuasi dute la p. 78 e lis primis trê riis de 80, nol sarès stât nuie di mâl. Culì l’autôr al interven a dî la sô opinion su ce che al è daûr a contâ, fasint une sorte di invasion di un cjamp che nol è so. Naturalmentri al è libar di vê lis sôs opinions, ma, inte economie e inte cifre stilistiche de conte, al sarès stât miôr che e fos la storie stesse a palesâ il judizi dal autôr sui fats. Ancje par vie che il davuelzisi de conte al fâs vignî fûr une morâl une vore plui articolade e plui complesse de opinion esprimude inte pagjine 78. Al di là di cheste considerazion che e pues jessi une idee di condividi o di no condividi, al va dit che il libri si lu lei di un flât e che al à moments di tension une vore inceôs. In particolâr il moment de vuaite che i ven fate a Simon al è costruît cun sapience narative e ben struturât. In gjenerâl si trate di une ricostruzion di un periodi di grandis trasformazions industriâls dai prins agns setante. Dongje dal aspiet naratîf e va segnalade la grande competence di cui che al scrîf in cont dai procès di produzion di açâr. La descrizion dal for e dai difarents moments de lavorazion a son tra i presis plui impuartants dal libri. Di preseâ ancje la lenghe che e cor vie slisse cence intops. Salacor cualchi talianisin si varès podût evitâlu. No sai spiegâmi, po, certis ossilazions: stasie p. 4 e stansie p. 6; maçet e mecet trê riis plui in sot (p. 90). Dut câs une leture plasevule, une scriture sigure che e dinote paronance dai mieçs espressîfs. La narative in lenghe furlane e pues spietâsi altris provis interessantis di chest autôr!
Tarcisio Mizzau, Il fôr Martin, Cinisello Balsamo, 2006, ed. SilvanaEditoriale
:::::::::::::::::::::::::::::::::::::::::::::::::
Corot tal teatri umoristic
Ae fin di Jugn al è muart Lauro Moja, il «Bastian» dai Trigeminus, il trio umoristic protagonist di spetacui di sucès ator pai teatris de regjon e ancje in television. Doi agns za fa une lôr esibizion e jemplà a plen il Teatri Gnûf «Giovanni da Udine» di Udin. (Redazion)
