Al puarte indevant il sium dal so mestri Nico Pepe (che al fo diretôr dal «Teatro Ateneo» di Rome e dai Teatris stabii di Turin e Palermo): chel di rivâ a meti sù une compagnie di professioniscj cuntun repertori in marilenghe. Dal 1987, cuant che Pepe al murì, e massime di cuant che al fo elezût conseîr comunâl a Udin tal 1998, Bepi Agostinis – vetrinist di profession, ma cul teatri tal cûr – al fasè sô chê idee e al scomençà a pensâ ancjemò plui in grant, sburtant par meti in pîts un Teatri stabil furlan. Cul jutori de «la Patrie dal Friûl» e de Societât filologjiche furlane al à tirât sot, in 5 agns, sù par jù 4 mil 600 firmis a pro di chel progjet, che al nas dal desideri di valorizâ e rinfuarcî la lenghe furlane, di puartâle fûr dal Friûl par fâ cognossi une culture restade sierade masse a dilunc, di stimolâ la produzion di tescj origjinâi in marilenghe.
Agostinis, sul Teatri stabil a vignî lis ideis a son claris…
«Sì, chest Teatri al varès di jessi autonom, logât intun dai trê cjâfs lûc di Provincie furlans, ma cun caratar itinerant, e al varès di vê une compagnie stabile di atôrs professioniscj, che e varà di puartâ i spetacui in marilenghe ancje te scuele. In Friûl-Vignesie Julie o vin za dai teatris stabii, ma nissun al à a ce fâ in detai cul furlan».
Parcè i furlans domandino un Teatri stabil o une compagnie stabile di professioniscj?
«Parcè che il teatri al è un mieç une vore impuartant sedi par pupilâ sedi par valorizâ la marilenghe su dut il teritori furlan, ancje par puartâ la nestre culture ator pe Italie e tal forest, e no dome intai Fogolârs. Dome puartant a un nivel professionâl il nestri teatri, chest al podarà rinovâsi e miorâsi. E no podaran fâlu lis filodramatichis, pûr cun dute la pensative e passion che a puedin meti tai lôr spetacui, ma che a restin a un nivel diletantistic».
Cjalant indaûr, no son tancj i esemplis di un teatri in lenghe furlane di cualitât fat di professioniscj…
«Just. O ricuardi dome “I Turcs in Friûl”, tal 1995, pe regjie di Elio De Capitani, gjavât fûr di un innomenât test di Pasolini, e “Bigatis”, tal 2000, direzût di Gigi Dall’Aglio, partint di un test di Elio Bartolini e Paolo Patui. A verin un impuartant sucès di critiche e soredut di public, e ancje chei che no mastiavin il furlan ju capirin e, a dilunc, ju aplaudirin».
Viodial vignî indevant un gnûf «I Turcs tal Friûl»?
«No in curt».
Nuie di segnalâ tal panorame dal teatri furlan di vuê?
«Mah, a son brâfs atôrs professioniscj furlans, che a puartin in sene lavôrs, ma cun doi, trê personaçs. Il Teatri, chel cu la T maiuscule, e je une altre robe».
In seste Comission conseâr Pietro Colussi, dai Citadins pal president, al veve obietât che no son tescj in marilenghe impuartants di rapresentâ.
«Sì, ma cuntune compagnie di professioniscj, i nestris dramaturcs a saressin sburtâts a esprimi la lôr fantasie, ancje parcè che i tescj no vignaressin presentâts de solite filodramatiche e no dome in Friûl. E, se al covente, intun prin timp si pues voltâ par furlan autôrs forescj, lu à pûr fat il Stabil sloven (in cheste direzion al va il Css che al prodûs “La lungje cene di Nadâl”, at unic di Thornton Wilder, tradusût in marilenghe di Paolo Patui par Gigi Dall’Aglio, che si podarà viodi te suaze de stagjon 2007/2008 dal Teatri Gnûf Zuan di Udin, ndr)».
Isal pardabon il «materiâl uman» par meti in pîts une compagnie stabile di professioniscj?
«Sì, lu à preparât la Civiche academie di art dramatiche “Nico Pepe” di Udin cul cicli trienâl par atôrs professioniscj dal teatri furlan (che Agostinis, di conseîr comunâl di Udin, al à vût il mert di inviâ, ndr). Dut câs, a varessin di jentrâ dome atôrs za innomenâts in cjamp statâl o diplomâts in academiis teatrâls».
Recitâ par furlan nol è, duncje, sinonim
di sieradure.
«No, nol vûl dî sierâsi tal nestri scus, ma podê puartâ fûr la nestre culture e fâle cognossi inmò miôr. Il teatri che o domandìn di realizâ al varà di vivi di inovazion e di ricercje, nol varà di cori il pericul dal isolament. La compagnie stabile furlane e varà di confrontâsi cun chês di Regjons dulà che a son, come inte nestre, lenghis minoritariis, par insiorâsi culturalmentri. E varà di fâsi puartevôs, sul plan regjonâl, talian e internazionâl, de culture e de civiltât furlane, sedi pal lavôr sul palc di sene sedi cun altris ativitâts culturâls, ancje in colaborazion cui scritôrs e poetis di chenti, tant che leturis, conferencis, iniziativis cu la scuele, teatri pal mont dai lavoradôrs… E varà di crodi intune sô funzion sociâl e culturâl, di incressite dal public. E je ore di fâ teatri dome cun chê di fâ ridi. Il teatri al à di cjacarà dai problemis dal vuê, al à di fâ pensâ».
Teatri stabil, a int lu domande
De istituzion di un Teatri stabil par furlan, domandât di 4 mil 600 furlans sù par jù, si fevelarà in Consei regjonâl dome in Otubar, te suaze de discussion de gnove leç su lis ativitâts di spetacul dal vîf. Lu à confermât Kristian Franzil, president de seste Comission conseâr, che, ai 7 di Jugn, e je stade presentade la petizion a pro de istituzion dal Teatri stabil furlan o di une compagnie stabile professionâl di teatri par furlan, prudelade ancje dai presidents des Provinciis furlanis di Udin, Marzio Strassoldo, di Gurize, Giorgio Brandolin (che cumò nol è plui in cjarie), di Pordenon, Elio De Anna, dal retôr de Universitât dal Friûl, Furio Honsell, di personalitâts de culture e di clapis culturâls, tant che la Filologjiche furlane. Pecjât dome pe int di teatri, che e à pandût «pocje sensibilitât pe iniziative – al dîs Agostinis, che al à ilustrât la propueste in Regjon –. Forsi a àn pôre di pierdi bêçs pal lôr ortut».
«Alc o fasarìn», al dîs Franzil, ma, al pâr di capî, dificilmentri si rivarà a un Teatri stabil, ancje par vie dai «coscj significatîfs che e à une struture di cheste fate». La petizion e jere stade presentade al president dal Consei regjonâl Alessandro Tesini za ai 30 di Zenâr dal 2006.
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
La tiere e la grepie / 2022: An internazionâl de pescje artesanâl e de acuiculture
Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +
Austrie / La Universitât Popolâr che si indrece a dutis lis fassis di etât
Barbara Cinausero
Si Beate Gfrerer, 54 agns, che bielzà di 25 e je a cjâf de Volkshochschule (Universitât Popolâr) carinziane, e je stade nomenade “Carinziane de Zornade”. O soi stade par cinc agns in Carinzie e propit in cheste scuele o ai insegnât e o ’nt cognòs ben la organizazion. Juste in chel periodi si insaldave il […] lei di plui +