La tradizion che no tire i scarpets

(ma lis furlanis a tirin un grum!)
E je une des compagniis plui bramadis, presince indurante di rivistis patinadis e tapêts ros, la plui fotografade sui social, dentri di palaçs di marmul o su la rasule di splazis esotichis. In sumis, la rivelazion dai ultins agns.
No, no fevelìn di une atore o di cualchi cjantante, e nancje di une influencer, aben che la nestre protagoniste misteriose e sedi deventade lôr grande amie, intun rapuart, che plui che cûl e cjamese, al è chel di pît e cjalçadure.
◆ Sì, parcè che si cjatìn denant di une tipologjie di scarpis che e à striât ducj i fashion addicted, di modelis e atôrs (Vanity Fair lis mostrave tai pîts di Kate Mosse tal 2019, ma George Clooney al veve za olsât a fâses viodi intor intal 2014), fin a rivâ ai canais di cualchi famee a la mode.
La lôr nomee si è sparniçade tant, che difûr di ciertis buteghis di Milan a buinore e je bielzà la code par rivâ a comprânt un pâr, cun presits che a passin ancje i 500 euros. E cuissà trops di voaltris che a fasaran un sbalç su la cjadree, a scuvierzi che chestis benedetis scarpis a son i scarpets, o stafets, cognossûts cumò in dut il mont tant che “friulane”, “furlane”, “furlanis” e “scarpez”, ma ancje cul non di “papusse”, “venetian slippers” o “gondolier slippers”, par vie che, cuissà parcè, i produtôrs plui fuarts si ju cjate propit a Vignesie.
◆ La solite sgrife dal Leon? A dîle juste, chestis cjalçaduris a fasin part ancje de lôr tradizion (i gondolîrs lis dopravin parcè che la suele no ruvinave il len des barcjis), ancje se, tal lei ciertis descrizions di sîts internet che a vendin lis furlanis, la vere origjin e ven platade une vore ben (intun test par inglês, si lei fintremai cheste afermazion: “Ma parcè furlanis? Forsit parcè che a incjarnin la tradizion, l’artesanât e chel aiar tipic di dolce vita taliane”).
◆ Dal rest, ancje nô o sin simpri stâts usâts a presentâsi tant che “Friuli, near Venice”, si che duncje nol è di maraveâsi se il rest dal mont al va a tucâ te puarte di chei dongje (in Australie lis furlanis a son lis “çavatis furlanis venezianis”, un biliet di visite che le dîs dute su la lôr identitât confusionade).
◆ Al sarès pluitost di domandâsi cemût mai che noaltris no sedin bogns di valorizâ i nestris prodots, cence une pocade foreste (che tantis voltis nus bute in bande). Tal câs dai scarpets, in particolâr, si cjatìn denant di une tradizion che e jere cuasi muarte, stant che nissun ju voleve plui e i produtôrs a lavin al mancul. La scarpe simbul de Cjargne e jere buine dome pes scansiis dai museus, e lis frutatis i ridevin daûr a di chel ranzidum che nancje la none no varès plui metût intor.
◆ Cumò, in gracie di un adatament inteligjent e di un lavôr di marketing, ancje di bande di aziendis furlanis, lis “papucis di carampane” a son deventadis un must have, che al met adun l’aspiet eco-friendly (la suele e je fate cun cuviertons di biciclete), comoditât, artesanât e elegance, par une çavate trendy e adate a dutis lis ocasions.
◆ Il svindic dai scarpets, dut câs, al à un savôr amâr, parcè che al testemonee une altre ocasion straçade pe valorizazion des nestris risorsis, ma soredut parcè che il prin a no crodi intal lôr sucès al è stât il lôr popul. E pôc al conte se cumò a lenzin i pîts di int abenade di ducj i continents. Ce che al vâl al è il nestri vê volût dismenteâ il gjest di dutis chês feminis – lis nestris nonis, lis nestris maris – che cun sacrifici, sgrimie e orgoi a garantivin l’avignî de famee, fasint culumie di chel pôc che a vevin.
◆ Ma forsit no dut al è pierdût: une flame di sperance e restarà ancjemò impiade, se e larà indenant la tradizion di chei paisuts indulà che, cuant che al nas un frutin, cualchi femine si fâs dongje cuntun pâr di scarpets in miniature, par cuant che la canaie e tacarà a talpetâ. E us garantìs che la sensazion e je chê di jessi dutun cul spirt di chê tiere che e spiete dome di jessi esplorade dai nestris fîs. ❚