Mariano 2, l’ultin dissendent de raze bovine furlane storiche, la Beletade

Mariano2, il torel che o viodês inte foto, ai 19 di Març passâts al à fat un an. Nassût inte Tignude Marianis di Palaçûl, fi di Tobie Friûl e di Lilli, al è cressût intes stalis de aziende Ricchieri di Vile di Flum, gjestide de Anapri. Tra pôc, al cjaparà la strade par Morùs par rivâ li dal Centri Taurs e Stalons de Associazion arlevadôrs dal Friûl-VJ, dulà che al scomençarà la sô cariere di riprodutôr. E, a nô, ce nus intaressial?, si domandarà plui di cualchi letôr.
In realtât, la robe e varès di impuartânus tant di plui di ce che al sucêt pes vicendis di RinTinTin, o di Lessie, o di Furia, o di Babe o di altris cuadrupedis plui televisîfs, stant che Mariano2 al è l’ultin dissendent de storiche raze bovine furlane “Pezzata Rossa” – chê che si disevii Beletade – e che cumò e conte pôc plui di une ventine di esemplârs ancjemò in vite, dentri di cualchi stale nostrane gjestide di arlevadôrs custodis. Une raze che, dal 1986, e à non “Pezzata Rossa Italiana”: no je la solite robarie di chei che a dominin – cemût che al dîs cualchidun – ma il risultât dal lavôr di miorament gjenetic tacât cun sucès intal nestri teritori. La vacje beletade furlane e à contribuît in maniere impuartante al disvilup de economie rurâl regjonâl e des latariis, dal periodi dal dopovuere incà.
Se o tornassin a fâ sù il nastri di cheste storie, di fat, ce podaressino viodi?
Inte seconde metât dal ’800, par lâ incuintri aes esigjencis dai arlevadôrs, la Comission Zootecniche de Provincie di Udin e à scomençât il miorament dal besteam locâl introdusint prime taurs di varie divignince e, intal 1884, taurs Simmenthal. Il cjapâ fuarce di chest incrosament nol è stât sempliç, ma la reditivitât plui grande puartade dal ecuilibri tra lis trê atitudins – lavôr, cjar e lat – e à permetût il sucès definitîf dal “gnûf” nemâl e cussì e je nassude la “Pezzata Rossa” furlane. Sul imprin, il bovin “Pezzata Rossa” al jere arlevât ancje in sostituzion dal cjaval, pal lavôr intai cjamps, viodude ancje la sô masse fisiche impuartante che i assegnave il sorenon di “bo cjaval”. Intai agns, la produtivitât e je tant cressude che a son scomençadis lis primis esportazions di vidiei pal ingràs viers dal Venit e de Toscane e i furniments di cjar aes citâts di Vignesie e di Triest. Intal 1914 si à decidût di sierâ lis importazions di riprodutôrs dal forest e di scomençâ un lavôr di selezion autonom cul besteam presint in regjon, fermât de Prime Vuere Mondiâl. Intal 1926, la raze e podeve dîsi ricostituide e si à decidût di rinunziâ aes importazions e di incentivâ la ativitât di selezion locâl. Dal secont dopovuere, abandonade la atitudin al lavôr, si à pontât al miorament de produzion di cjar e di lat, cence rinunziâ ae rusticitât, cun risultâts otims.
Vuê, In Italie, la “Pezzata Rossa” e je la seste raze bovine plui presinte intai arlevaments. I bovins arlevâts a son cuasi 206 mil. In Friûl-VJ e rapresente plui di un tierç dal patrimoni bovin regjonâl e e je la raze plui arlevade cun passe 26 mil animâi su plui o mancul 75 mil bovins presints in complès intes stalis dal teritori. ❚