Il ‘broili’ di Carli il Grant

La agriculture furlane
tal timp dal Sacri Roman Imperi
In timp dal confinament, o ai tornât a cjapâ in man “Il Capitulare de Villis”, une biele publicazion curade di Enzo Marigliano e stampade di Gaspari, tal 2013. Al è un piçul volum une vore interessant che al à dentri un document di Carli il Grant de fin dal secul otâf daspò di Crist, al prin lusôr de Ete di Mieç. Robe antighe? Sì. Ma no par chest al è dibant leile.
◆ Marigliano, cuntune contestualizazion un grum acurade che e ven daûr ae prefazion dal storic Paolo Cammarosano, nus cjape pe man vuidantnus ae leture di chel che al è considerât un dai plui impuartants cuarps normatîfs de Ete di Mieç. E che nus rivuarde di dongje, stant che il Sacri Roman Imperi al à batût i Langobarts tal 774 e al à slargjât il so podê su dute la Italie dal Nord, e ancje sul Friûl, par un centenâr di agns. Si fevele di normis, duncje, che ancje i nestris vons a vevin di rispietâ, di condividi e, se al coventave, ancje di gloti.
◆ L’Imperadôr Carli il Grant (742-814)  al scriveve lis regulis di compuartament a pro dai siei judex, la classe di funzionaris imperiâi che a rapresentavin figuris di colegament jenfri la cort e il popul: e chestis normis a coventavin parcè che lis “vilis” (ven a stâi i borcs, cemût che ju clamaressin cumò), a fossin ben aministrâts. Al jere un corpus normatîf fat di 70 “cjapitui” organizâts in maniere di difindi e di rinfuarçâ la autonomie (che in chê volte e jere une vere e proprie autarchie) di ogni comunitât spierdude ator pal teritori imperiâl, intune ete di invasions, di cjaristiis e pestilencis.
◆ Il cuadri che al ven fûr al jude a mudâ un tic il judizi che tancj di nô a àn su la Ete di Mieç che e je stimade indaûr e puare e vonde. Al è cetant interessant scuvierzi, par esempli, che chel che vuê o clamìn par furlan broili (“une piçule braide dongje di cjase, sierade cuntune maserie, coltivade a vîts, pomârs e a ort”, lu definìs il Pirona) e in chê volte si clamave brogilos, al à un so ricognossiment al cjapitul 46 che al invide i judex a “tignîju ben a ments”. I puieris (cjapitul 15) a vevin di jessi consegnâts ai siôrs ai 11 di Novembar (Sant Martin),  la dade stagjonâl che e segnarà par secui la scjadince dai nestris contadins (sotans), tal lôr rapuart cui parons de tiere.
◆ Tantis a jerin lis regulis imponudis par obleâ i abitants des “vilis” a lavorâ e a trasformâ i prodots agricui (cjar, vin, formadi, bire, farine, mîl), cu la “massime pulizie”, previodint fintremai che “nissun al fasi pestefruce cui pîts de nestre ue ma ancje la produzion dal vin e sedi fate cu la plui grande netisie”, doprant turclis fats di pueste e “ben tignûts”.
◆ Il document al è pardabon siôr di riferiments ai animâi: ocjis; pioris, cjavris e montons; cjavai (pes corts e pai soldats); vacjis (di tîr e di lat); purcits (pe cjar e pal saìn); poleçs e gjalinis (pai ûfs); âfs (pe mîl e pe cere); pes (ancje di arlevament). E no mancjin, clâr, lis parts dedicadis ai temis de agriculture vere e proprie, là che si regole la manutenzion di boscs e boschetis, la coltivazion dai vignâi e la fabricazion de bire, par esempli e, ae fin, si fâs une liste di 72 jerbis di ort e medisinâls e 15 varietâts di pomis che no vevin mai di mancjâ intal “ort botanic” di nissune “vile”.
◆ Ancje chest al è un esempli di cemût che za in chê volte si volès tignî cont de “biodiversitât” di une nature che e riscjave di viodi metudis a risi, scjafoiadis dal sec o inneadis de ploie, dutis lis ricjecis di un patrimoni che al à nudridis dutis lis gjernaziis prin de nestre, e che cumò o riscjìn pardabon di pierdi. ❚