La storie de “ponte di citât” contade dai fruts in lenghe furlane

Un CD li che si conte la storie di Cividât fat dai fruts de citadine, chei des classis III e IV de primarie dal istitût comprensîf di Cividât, dut in lenghe furlane e ilustrade dai lôr dissens. Il lavôr al è stât presentât il mês stât in Comun des dôs classis cu lis mestris e i gjenitôrs devant dal sindic Balloch e de dirigjente scolastiche Anna Maria Buttazzoni. Il spont al è stât un progjet metût dongje dulinvie dai cors di furlan, cul jutori de mestre Maria Teresa Pinto, insegnante de classe III elementâr “A. Manzoni”, dulà che a vegnin presentâts in struc diferents cjapitui de storie de citadine: la sô nassite, la vignude dai Langobarts, il mudament de sede Patriarcjâl; la nassite dal Stât de Patrie dal Friûl (inovâl che chest an al è stât fat propit a Cividât); il significât des rievocazions storichis che si fasin; i personaçs plui innomenâts e lis tradizions de citât. Cence dismenteâ i riferiments e i leams ae lenghe furlane: o ricuardìn che e je stade cjatade chenti la prime poesie scrite in marilenghe (“Piruç myò doç inculurît, cuant yo chi vyot, dut stoy ardît…”), e tancj altris documents antîcs, come lis traduzions dal furlan al latin fatis te scuele par nodârs di chei timps. Lis mestris a àn puartât ator i fruts a scuvierzi il teritori dulà che a son a stâ, di mût che la osservazion e la esperience direte de art, dal teritori e dai siei monuments a son deventâts un supuart didatic fondamentâl pal davuelziment dai programs scolastics, stramanâts doprant la lenghe storiche locâl. La iniziative e je plasude ae aministrazion, tant che e metarà il CD rom sul sît istituzionâl: ducj a podaran sintî la storie da la vôs dai fruts, comentade cui lôr dissens. Un biliet di visite une vore origjinâl e inovatîf par cui che al vûl cognossi di plui de citât deventade sît Unesco, a partî de antighe lenghe dal lûc, il nestri furlan. ❚
TDM