Friûlpoint, «maiutis par furlan dal 1999»: passe 20 agns di ativitât pe dite di t-shirt par furlan, duncje. E no sintîju! Chest an, in plui des maiutis pe gnove stagjon, la Friûlpoint e bute fûr tantis altris novitâts.
◆ «Ogni an, sù par jù in Mai, o presentìn 3 o 4 maiutis gnovis» nus spieghe il titulâr Michele Venier «ma chest an pôc prime di mostrâ chês o vin fat une robe gnove». Michele al fevele dai scjaldecuel (o tubolârs, e par cualchidun “bandanis” ndr) «il prodot dal moment, che si sta difondint parcè che a son une vore pratics, par sportîfs e no dome: tu lu tegnis te sachete e al pues jessi siarpe, fâ di cjapielut, suiâti il sudôr».
◆ Dut cun grafichis une vore coloradis che ju fasin someâ foulards. «Sì, no si cjate tante robe compagne ator: o vin fat 9 grafichis e mi plâs fevelâ di chê dulà che o vin ricjapât la acuile che e je sul mantel di Bertrant in Domo a Udin, che e devente une texture une vore rafinade».
E a proposit di maiutis che si fevelave al inizi, cualis sono lis novitâts? «Chest an o vin une maiute dedicade ai furlans che a van… a manete: la scrite e je cheste, “a manete” cuntune grafiche ispirade ae velocitât» al dîs Michele. «Dopo o vin une dedicade ae musiche rock “sex and frico and rock ‘n’ roll”, une al salût plui biel dal mont: “mandi”. Ma la miôr robe e je lâ a scuvierzilis dutis sul nestri sît www.friulpoint.it».
◆ Forsit no ducj a san che lis maiutis de dite furlane a son di lôr produzion e design. «Sì, no doprìn maiutis che si cjatin za prontis, ma e je une produzion che o fasìn fâ di pueste: coton, fitting e progjet decidût di nô.»
◆ Michele mi mostre une maiute par ledrôs fasint viodi la etichete cu lis descrizions di leç «No cjatais di nissune bande al mont une etichete cussì, cu lis indicazion obligatoriis ancje par furlan». Vere. Par esempli sot de composizion (1005 coton) al è scrit “do not iron printed decoration”, par inglês, e “sopressâ il dissen par ledrôs”, par furlan: al fâs efiet.
◆ Dutis lis altris produzions e novitâts dal brand furlan si puedin viodilis no dome sul sît www.friulpoint.it ma ancje su Facebook e Instagram. Come che al diseve un lôr vecjo slogan, “Friûlpoint no ti lasse crot”. Nancje sui social. ❚
Redazion
La stagjon di Friûlpoint e je fisse di novitâts
Redazion
