La salût dal Friûl e passe pe sô tierce ricostruzion

La profezie dai savis: intervignî
cumò par che la nestre regjon no resti cence avignî
Par solit cuant che si lei di grups di ex sindics, deputâts o senatôrs che si mobilitin par alc, si pues vê un mot di fastidi. Al ven di domandâsi parcè che cheste int no sedi buine di gjoldisi i agns di polse (plui che meretade, par cetancj di lôr): dal rest, e je stade propit la classe dirigjente dai agns passâts a usânus a no fâ fidance ni su lis promessis ni su lis peraulis di tancj – masse – che a àn voltade bandiere daûr dal aiar che al tirave.
Si reste, duncje, a scuvierzi che il gnûf comitât pe “tierce ricostruzion dal Friûl-Vignesie Julie” che al à davuelte a Cjasarse la prime cunvigne, dedicade ae nestre economie e aes pussibilitâts di disvilup che e podarès vê in gracie dal Recovery Found, al è fat sì di int che e à vudis esperiencis di ogni gjenar, ma nol à obietîfs ni personâi ni eletorâls: dome la bisugne di dismovi lis cussiencis e fâ vierzi i voi sul stât di salût (pocje e mâl curade) de nestre tiere. Si trate di oms (dome oms, e lis feminis dulà sono?) une vore atents, e combatîfs: Mario Banelli, Ferdinando Ceschia, Guglielmo Cevolin, Gianfranco Ellero, Sandro Fabbro, Antonino Morassi, Roberto Muradore, Pietro Mussatto, Ubaldo Muzzatti, Diego Navarria, Maurizio Piemonte, Giorgio Santuz, Bruno Tellia e Roberto Visentin.
◆ I savis, cundut che a àn cualchi carnevâl su la schene, a san ben che par podê fâi cuintri ae crisi bisugne elaborâ propuestis, progjets e strategjiis. Il moment al è une vore delicât, nol covente ricuardâlu, ma la pandemie resinte e à dome metût fûc suntune situazion economiche za problematiche e in decressite fuarte, che e à di jessi frontade cuntune ricostruzion – la tierce, daspò di chê dal dopovuere e di chê causionade dal Orcolat –.
◆ Intal passât, il statût speciâl nus à zovât une vore; intai ultins agns, dut câs, al è deventât plui un sproc che un imprest di disvilup, cul risultât di paiâ a presi cjâr lis decisions fatis (e soredut chês mancjadis). Par vê un confront, al baste butâ il voli aes provinciis autonomis di Trent e di Bolzan, che, a dispiet de crisi, a àn mostrade une buine rispueste sedi par chel che al inten il Pil, sedi par chel che al tocje la cressite demografiche. Chenti, invezit, cemût che al à marcât il professôr Sandro Fabbro, di fat, in dîs agns (2008-2019) il Friûl al à pierdût l’11% dal redit (cuintri il 5% di dute Italie e il -0,3% dal Nordest), cu la provincie di Udin che e à vude une decressite fintremai plui fuarte dal Sud di Italie (-15% cuintri il -11% dal meridion).
◆ Clâfs di leture di chescj dâts a puedin jessi viodudis inte mancjance di atrat, di invistiments e di personâl cualificât, inte emigrazion fuarte, massime dai zovins (soredut di chei preparâts) e inte contrazion demografiche, cuntune popolazion simpri plui indenant cui agns (la regjon plui vecje di Italie, dopo de Ligurie). I teritoris si disvuedin, e no dome chei de mont, cun cualchi ecezion che dut câs no rive a fâ di tamon pe economie regjonâl (cantîrs di Monfalcon e puart di Triest).
◆ In dì di vuê, daspò de tamesade dal lockdown, si cjatìn a jessi tornâts al Pil di vincj agns indaûr, cul risultât di vê butât tes scovacis il lavôr di une gjenerazion interie. E lis prospetivis no son par nuie positivis, se si pense che intai timps de ricostruzion daspò dal taramot il Friûl al podeve contâ sul jutori di chei altris, intant che vuê o sin ducj su la stesse barcje, piçule e darote, cun chei altris che a sburtin par rivâ a stâ sù.
◆ Cun di plui, i grups dirigjents no mostrin reativitât e a somein jessisi scuindûts. Lis istituzions, cun di plui, nol pâr che a vedin clâr il lôr rûl, o forsit a àn miôr une presince cidine, biel che i partîts no son bogns di dâur une formazion ai zovins, cul risultât di cjatâsi a jessi guviernâts di int inesperte e no preparade. Forsit al è destin che a dâi une scjassade a cheste situazion di flaparie al sedi un trop di lôfs cul pêl sâl e pevar, pronts a fâ sintî la lôr urlade e a meti in vuaite la covade sui pericui pal avignî.
◆ Ogni Regjon, di fat, e varà di lavorâ a fuart par vê un pês decisionâl su lis risorsis finanziariis che a rivaran al Stât di bande de Europe (il “Recovery and Resilience Facility” e il “Next Generation EU”). Covente prontâ un plan strategjic, cun progjets che a cjapin dentri dut il teritori, cuntun voli ae sostignibilitât e ae digjitalizazion di zonis disvantazadis, tant che la mont. Ma la classe dirigjente di cumò – si domandin i savis – ise in stât di fâlu? La rispueste ur tocje ai nestris sorestants: a lôr decidi se fidâsi di chescj savis e lâur dâur, o se restâ fers ta chest pantan a cjalâ chei altris movisi ancje par nô. ❚