LA POESIE. Lune gnove di Jugn

Lune gnove di jugn,
sesule fine
pal forment madûr;
lune dal ricolt spetât,
lune di un bramât,
a lunc, amôr.
Lune gnove,
sul blanc tremôr di agacis,
sul blanc profum
che al incjoche la sere.
Lune in scolte,
sul prât,
lune.
Enrica Cragnolini (1904-1973).
Mestre di Dartigne, e à vivût simpri in maniere riservade, cence sunsûr. Di segnalâ la sô amicizie e lungje corispondence cun Pasolini, che le stimulave a scrivi. Intimisiche e cosmiche intal stes timp, la poesie di Riche e je stade publicade dome postume (1973) inte racuelte Il pujerut (che al jere il sorenon che i vevin dât di frute).
par cure di  Laurin Zuan Nardin