Sfuei Mensîl Furlan Indipendent
Archivi de Patrie

La nestre organizazion aministrative e à lidrîs fondis

............

O soi tornât a cjase juste nossere passadis trê setemanis di vacance. Cualchi dì a Rome e daspò in Toscane a Chianciano, sì che o ai vût il timp di  pensâ aes novitâts che si parferissin pai ents locâi ancje dal Friûl al pâr che par dute la Italie. Par filâi sore e capî cemût mai che il Friûl si presente cun usancis, costums e mûts di pensâ speciâi e cussì diferets mi à zovât sei la memorie antighe che chê resinte. Ve che la memorie antigonone mi puarte indaûr di passe doi mil agns che in chei timps des nestri bandis la int no jere tante e cun di plui sparniçade sul teritori in piçui grups miscliçâts di istrovenetics e celtics specie su lis monts intant che tal sud de penisule taliane a rivavin par mâr lis migrazions di espansion de grande civiltât greghe che si poià sore i popui locâi di prime.
In cheste suaze e nas Rome e e tache a slargjâsi fint che si rint cont che ancje il nestri cjantonut di mont al merte atenzion, propit là che lis aghis dal mâr cjalt a rivin plui a jentrâ intal continent european. Su la pôc abitade e malsane basse planure furlane, dal 181 prime di Crist, e ven fondade une colonie cul insedament dai prins passe 3.000 colons. Daspò, dal 169 p.d.C., a forin puartadis altris 1.500 fameis, sì che la popolazion e incressè fint a uns 15.000 di lôr. A jerin, pe plui part, vieris legjonaris e ce tancj di lôr a vignivin dal Sannio. A ogni colon i forin dâts 50 jugera (29 etars ≈ 80 cjamps), ai centurions 100 jugera (≈160 cjamps) e ai cavalîrs cent e cuarante jugera (≈245 cjamps). Lôr a fevelavin il latin che a savevin o che a vevin podût imparâ sot lis armis; parimentri i colons che a rivaran dopo. Intant che e vignive fate sù, seont il stamp roman, la citât di riferiment de colonie destinade a deventâ la grande Aquilee, chês fameis a cjapavin possès dai terens a lôr assegnâts a larc e in forme ordenade sul teritori. Si pues capî che lis lôr cjasis a pensarin di dâlis dongje in picui grups no tant lontans un di chel altri e colegâts tra di lôr cun stradelis sicu une rêt.
Passât cuasi un secul ae colonie di Aquilee i ven concedude la plene citadinance romane cussì che i dissendents di tierce gjenerazion dai prins colons a poderin dîsi cun braure e bon dirit: “civis romanus sum” e tignîsi par parons dai sîts che lôr a vivevin. Si stave cussì formant un model di ocupazion estensive dal teritori diferent di chel incentrât puartât dae civiltât greghe tal sud de Italie. Il model grêc al previôt une citât popolose là che si davuelç dute la vite sociâl cuintriponude ae vaste campagne dulintor, pôc abitade e che alì e conte dome la fadie dal lavôr di ogni dì. La citât di Aquileie e deventà grande e impuartant pont di riferiment dal imperi roman, ma i piçui insediaments  no discomparirin che anzit a mantignirin la usme de lôr dignitât di fonde.
Tal 452 d.d.C., Atile al metè l’assedi a Aquilee, le sdrumà e le brusà. Passâts dome 24 agns, dal 476, si à la fin dal imperi roman e in curt si piert ogni organizazion aministrative centralizade.
Unics ponts di riferiment pal popul a restarin chê rêt di piçulis comunitâts sparniçadis e la Glesie cristiane cu la sô struture nassinte. I longobarts, che a rivarin da 568, a zontarin a chei paisuts lis lôr “faris” che a jerin piçulis comunitâts autonomis di stampe militâr impastanadis su la parentât. La vite di ogni dì dai longobarts e jere incentrade su di chês piçulis struturis aministrativis che pûr a ricognossevin il Duche locâl intant che la identitât e cussience di gjernazie e jere garantide de figure dal Re che la sô esistence e jere pandude dai siei terens fiscâi, lis “curtis regiae”. Il gnûf imperi roman inmaniât di Carli il Grant nol savoltà la organizazion dai piçui paîs cussì che il mileni jentrant al cjapà cont de specialitât dal insediament dai popui dal Friûl sul teritori. Al zove considerâ ancje la cuistion des feveladis. La mode taliane di vivi in citâts, sul stamp de Polis greghe, e à favorît il formâsi di lenghis feveladis di popolazions citadinis avonde numerosis, fuartis economichementri e cuntun unic sorestant locâl di riferiment che Lui al veve interès e fuarce a difindi la identitât dal so principât. La pussibilitât che une fevelade e prevanzàs chês altris e jere leade ae fuarce dal numar de int che la cognosseve e ai scrits di presi culturâl che a lavin ator pal mont. La mode furlane di vivi in piçui grops sparniçâts sul teritori no dave chê fuarce ma pluitost e favorive il mantignîsi des carateristichis des feveladis di piçulis popolazions, ognidune cun cualchi preference lessicâl, ma dutis ben tiessudis su la stesse trame gramaticâl e sintatiche; une situazion dute diferente di chê des lenghis dal podê incentrât. Considerazions parelis si podaressin fâ pe organizazion aministrative a rimarcâ che intant che in Italie a nassaran i comuns in Friûl e larà  indenant la vicinie. Si disarà che e jere cjosse di pôc, ma il fat al è che i incaricâts di gjestî lis cuistions publichis a jerin ben cognossûts e tignûts valevui de int di chê vicinie che cun di plui, par svuincâ il pericul che cualchidun al les fûr di strade, si profitàs o che al sbissàs su lis palanchis, cetantis viciniis, i sorestants ju nominavin an pa an cu la proibizion che un al fos nomenât par doi agns in litanie. Ce diference cu lis profiertis dai dîs di vuê: une oligarchie formade di un grup di elets (benzà lôr pôc cognossûts) e larà a sielzi, sicu sensârs, un grop oligarchic plui zuiât che a chel i vignarà dât il podê di gjestî e il singul dal popul al pensarà che a sedin A.S.I. argagns svolants indefinîts (U.F.O.). Nuie pore, si varà ben timp di cognossiju che e je masse antighe la regule di no jessi elets in litanie. ❚
Gianni Sergio Pascoli

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +