LA INTERVISTE. Claudio Violino al fâs un belanç de esperience a cjâf dal assessorât regjonâl pe agricolture “mantignî il savôr de indentitât ancje e soredut in chest setôr”

Claudio Violino, 52 agns, za assessôr regjonâl ae risorsis agriculis sot la zonte Tondo: l’“highlander dai leghiscj”. Jenfri lis cjadreis dal emicicli triestin, la vitorie – sepûr di un pêl – de Serracchiani e à soflât vie cetancj de viele patulie verde-padane. E lui, che al è un dai doi confermâts su trê puescj in dut, al veve lassât un so segn, te passade legjislature. Al è stât il pari dal “Tipicamente Friulano”. Ghiringhei, sagris, prodots, stands in fieris: la acuile e il bolin blu dal “TF” a jerin a butinon par segnalâ che culì, il prodot al veve i crismis de cualitât locâl.
E cumò, Violino? Ce fin aial fat chê marche?
“Di ce che o ai let ator, al sarà doprât ancjemò par chest an, ma dome tant che logo, cence contribûts “a mont” e in vie transitorie parcè che a vuelin prime definî i contors legjislatîfs par dâ i contribûts pe promozion a ents e organisims”.
Ma al varà sintût cualchi vôs tal Palaç?
Tf al è une marche regjonâl gjestide da direzion agricolture, ancje traviers Ersa. Bisugnarès domandâ al assessôr Bolzonello, che al à la deleghe ae agricolture, e ae Seracchiani, responsabil de politiche de aministrazion.
Ma la tindince cuale ise?
Lôr a cirin di vê une marche uniche regjonâl che e sedi “omnicomprensive” di ducj i teritoris e ancje di dutis lis valencis, che suntune economie di scjale nol sarès nancje mâl. Dal sigûr, però, meti dut sot di une marche “Fvg” o pensi che al pierdi il sens di identitât e di atrazion che e pues vê. Jo o pues fâ un auspici: che e sedi fate une valutazion ogjetive di ce che al è stât, soredut tal setôr agroalimentâr, e che nol sedi metût in cantine dome par vie di une aministrazion di colôr diferent.
In ce sens une uniche marche?
Lôr a disin che “Tf” al è limitatîf, ma al conote un teritori. Ma ancje che vê plui marchis par esempli, il Live, Ospiti di gente unica, il stes “Tf” al è masse dispendiôs. A stan pensant a une marche uniche che e ledi a cuvierzi dut ce che al è Friûl-VJ. Ma cuâl e cemût… no lu sai.
Chest “Tipicamente friulano” al è stât ancje l’esempli di une regjonalizazion de agricolture.
La marche regjonâl e jere une operazion di marketing dulà che bisugnave fâ cognossi, identificâ un teritori, fâ vendi e che no fasès confusion tai consumadôrs. Al è stât un brand che al à vût un bon sucès, soredut te int che e viodeve i valôrs che a jerin dentri. Dopo, si capìs, nol è stât facil tirâ dongje ducj i prodots di Tarvis a Sacîl, di Fors di Sore a Triest… ma cuntun minim di fuarçadure al funzionà.
Ce rispuindial a cui che al fevele di un acentrament dentri di une uniche suaze regjonâl?
Che la agricolture al 99% e ven fate in Friûl cun Gurize, Udin e Pordenon. Po dopo e esist ancje chê dal Cjars… ma ce vevino di scrivi? “Tipicamente friulano – giuliano”? La grande part de agricolture e sta suntun teritori ben identificât che al è il Friûl. Anzit: di Triest il furlan al è simpri stât considerât “contadin”. E alore par une volte che i leìn ancje un marche a une agricolture o une societât… parcè no varessino di doprâlu?
Ce esperience ise stade chê di assessôr?
Positive: al jere un pont di afermazion personâl, par esperience, jessint ancje laureât in agrarie. I vin tentât di impostâ une sielte agricule regjonâl cuntune sielte di cjamp dal sigûr fuarte, coerente, funzionâl ai obietîfs e in timps curts. Ve chi: forsit no sin rivâts a vê il timp par fâle condividi ai contadins e ai protagoniscj dal teritori, cheste nestre vision politics de agricolture. O sin piçui: se no pontìn ae identitât, ae valorizazion di ce che si prodûs, o sin costrets a socombi par vie che te economie di scjale a vincin lis agriculturis plui grandis, plui fuartis, chês de Cine, de Argjentine, dai Stâts Unîts, dai Ogm. O vin fat un percors che in Europe no ‘nd è altris: une agricolture che e je furlane e che si diferenzie di chês altris.
Però tes ultimis batudis di legjisladure, Tondo al è jessût cuntune declarazion no cussì entusiastiche. Al disè che la agricolture a varès vût di lâ in mans a un tecnic.
Dal pont di viste uman mi à displasût. Al stave tal zûc, ancje. A ‘nd jere pressions di ogni fate… ma mi pâr che no i vedi puartât ben. No i à zovât par vinci.
Violino: lui si sintivial tant che un caric intune partide di briscule, aes regjonâls?
Claudio Violino no, ma la agricolture sì. Jo o dîs che la agriculture e jere une cjarte impuartante e lis sieltis in chest setôr forsit a son stadis mâl digjeridis e mâl capidis… ma no ‘nd è alternative ae linie di politiche agricule puartade indevant te legjislature passade. Forsit no le vin rivade a fâ capî nancje a Tondo. O a chei de Coldiretti. Chest al è un displasê. Però, cjalant indaûr, vuê o tornarès a fâ dut ce che o ai fat. ❚
✒ Oscar Puntel