La Fieste dal Friûl dal 2017 si fasarà a Sapade/Plodn E intant, pal passaç in Friûl, lis solitis promessis de politiche…

Il dissen di leç pal passaç di Sapade-Plodn al Friûl al rivarà in aule pe votazion finâl. La ultime promesse e je di Ettore Rosato, cjâf grup dal Partît Democratic ae Cjamare dai Deputâts in ocasion de assemblee nazionâl dai zovins de Anci, il “sindicât” dai comuns talians. Rosato però nol à specificât i timps, al à dome dit che il proviodiment nol restarà a fâ polvar tai scansei. Nol reste che ingropâ une altre volte il cjanton dal façolet e sperâ che no sedi promesse di Arlechin.
dal comun dal cjadovri intant si va indenant cu la bataie e il Comitât locâl al à anunziât che al  scrivarà une letare al president de Republiche Sergio Mattarella par sburtâlu a cjapâ posizion su pe discriminazion che a stan patint. Lunis ai 18 di Avrîl ancje la Zonte provinciâl di Udin e à volût continuâ a stâ dongje ai sapadins e il president de Provincie di Udin Fontanini al à clamât adun i siei assessôrs a For Di Avoltri, invidant a partecipâ ae riunion in trasfierte il sindic di Sapade Manuel Piller Hoffer. Po dopo, une altre manifestazion di vicinance e je stade decidude in ocasion de Fieste de Patrie dal Friûl, che ai 3 Avrîl passâts si è celebrade a Gardiscje.
in chê ocasion si à decidût che il prossim complean de patrie, il numar 940, al sarà festezât propit a sapade: la idee e je rivade dal president dal Istitût Ladin Furlan Lorenzo Zanon e subit si son dits dacuardi ducj, dai rapresentants dal Comitât di Plodn al president de Assemblee de Comunitât Linguistiche Furlane Navarria, al stes president Fontanini, fin a rivâ al conseîr regjonâl Claudio Violino che, ae vee de Fieste de Patrie, al à volût regalâ al sindic di Sapade la bandiere di vuere dal Patriarcjât, chê cu la acuile su sfont ros, simbul unitari di dut il Friûl. L’auspici al è che pai 3 di Avrîl dal 2017 cheste benedete leç e sedi finalmentri fate buine… ❚
✒ David Zanirato