“Chel che o viodês achì parsore al è ‘l’om vitruvian’ dal grant gjeni Leonardo da Vinci. Al rapresente lis proporzions perfetis dal cuarp uman. Ma Leonardo aial pardabon inventât lui cheste imagjine? A nô nus son rivâts in man dai disens dal timp dal Jurassic dulà che lis imagjinis pituradis no son di un omp! Che Leonart al vedi copiât? Voltait la pagjine…”
E, voltade la pagjine, e sclope une fieste di colôrs, di pipins ridicui, di batudis ferbintis.
A son i Gnognosaurs di Dree Venier, trê volums fin cumò vignûts fûr, un par an. La citazion dal esordi e je une sorte di introduzion al prim volum, che e à la funzion di incuadrâ chestis storiis inte suaze di une preistorie imagjinade a pueste par lassâ la fantasie dal autôr displeâsi libare di ogni costrizion.
E l’autôr, di fantasie a ‘nd à tante. Lui e ancje Elisabetta Pittana che e colabore cui tescj.
A bastin lis primis cinc pagjinis par fâ la cognossince cui personaçs principâi des strichis: Martin il triceratopi, Bombo il brontosaur, Momo il saur, Cicci la morose di Momo, il prof. Einsaur e Blik il so microaiutant, Rugne il brontosaur, Jurassic Casella il mâc, Mamy la mame preistoriche, i fradis Wright, Icaro e Agnul e Ines la vedrane. Intal secont numar si zontin il tenent Brontson e Jack O’Roby, il bronto-lari. Intal tierç il regjist Pteroslavskij e l’atôr Ciro. E altris personaçs minôrs tant che Milio top gun, il colonel Sauracci, Gjldo il brontosaur alpin e v.i..
Cinc storiis par ognidun dai trê libris. Ogni storie e à un fîl condutôr che al pues sedi une robarie, la scalogne che e perseguite un o plui personaçs, i regâi di fâ pes fiestis o par S. Valantin, la vendeme dai miluçs, la diete che Momo al scugnarà ben fâ timp o tart, i tentatîfs di svolâ, la ricercje di une baby-sitter… Lis strichis a àn un ritmi ternari, cu la prime vignete che e introdûs, la seconde che e disvilupe e la tierce che e risolf cuntune batude ben sestade. Dispès, jenfri une batude e chê altre, si cjate un za-zam, un crash, un spud, un r-r-rumble, un blaam: e si scuen dî che la lenghe furlane i va di cane a chestis divagazions onomatopeichis.
Ogni personaç al è ben caraterizât, Momo gjenerôs e biel, Martin che nol pues sopuartâ di vê un cuar su la muse (e che al à di vê i dincj che i tornin a cressi, di tantis voltis che i saltin vie…), Bombo che nol finirès mai di mangjâ, Cicci gjelose e crestose, Einsaur sienziât che nol cumbine une drete, Blik genial, ma che nissun lu cjape sul seri, Ines la vedrane che e je daûr a cirî un amôr, Casella il mâc (ma si cjate scrit ancje mago…) che al fâs magiis al contrari e v.i.
Al reste dome di spietâ il cuart volum. E po il cuint e il sest e… chei altris. ■
Laurin Zuan Nardin
