LA FABRICHE DAI… LIBRIS. Cirint chê siore opare disperatementri

Il scjas fat di Carlo Tolazzi cuntune letare al Mesaggero Veneto dopo l’ultin Sant Simon, li che al jere president de jurie dal Premi, al à provocât une schirie di interessants ripensaments su la salût de narative e de culture contemporanie in marilenghe. A son stâts un grum di intervents su la stampe, sui blogs furlans su internet e pe radio. Tra i tancj si segnalin i coments di Marchetta, de fie di Gregoricchio, di Matiuzza e di Carli Pup.
Ae fin la miôr sintesi le à probabilmentri fate Mario Turello sul Messaggero dai 31 di Dicembar disint che “i libris e lis rivistis par furlan a àn une circolazion scjarse rivant a un public masse limitât par stiçâ gnovis vocazions e gnovis esperiencis. Di chest a varessin di ocupâsi la editorie, la scuele, la politiche, la critiche. Nissun al è cence colpis”.
VISION FUNZIONÂL_ Il paradòs furlan, dificil di meti intes suazis tradizionâls de leterature dialetâl taliane, e je la sô piçule ma aromai lungje tradizion di prose. Une impostazion di pinsîr, une vore di mode, e dîs che mentri la poesie par furlan e je rispietabile jessint dongje ae anime e al cûr, la narative no varès di jessi fate par lenghe locâl. Si à cussì une vision funzionâl de leterature, ven a stâi si dîs che e je la narative che e da il status di lenghe, se no esist buine leterature alore no je une vere lenghe.
Chest al è un mût di pensâ di tancj di lôr, furlaniscj e talianons. Si finìs cussì cul difindi la produzion furlane ancje cuant che no je buine o, di chê altre bande, si le denigre simpri e in ogni câs.
IL BON ATOR_ Se no si cjale dome il Sant Simon alc di bon ator al è, par esempli i scritôrs de riviste La Comugne (ed. KappaVu), o chei che, in maniere underground, forsit plui diletantistiche ma di sigûr interessante, a zirin ator al blog leterari di Contecurte. La domande che ven iniment e je se lis boris sot de cinise a rivaran a fâ ardi il fûc o si distudaran planc plancut. Ator e somee jessi une spiete cuasi messianiche di un grant autôr cuntun capolavôr di narative in marilenghe. La sô e sarà une imprese di chês dal impussibil: contâ dal Friûl in maniere moderne e universâl, jessi bon di lâ sui mass media a propagandâ la sô opare, fâsi lei par furlan ma vignî ricognossût de culture taliane e foreste, salvâ lis varietâts, deventâ un model di koinè e stabilizâ la grafie.
Masse robis?
Mi sa che cuant che al rivarà il grant autôr al sarà completementri difarent di ce che si spietìn parcè che cussì al sucêt simpri cu lis profeziis. Par intant al sarà ben judâ i autôrs che o vin, criticantju e disint ce che nol va, ma simpri cun chê di fâju cressi e fâju lei. Dal rest cheste e jere la idee origjinarie dal Sant Simon e di ducj chei che a àn lavorât intai agns par fâ lâ indenant il premi.
Maurizio BIASIZZO