“CUALE ISE LA ATIVITÂT DI “RIPULIAMOCI CHALLENGE”?
“RipuliAMOci Challenge” al è un grup Facebook di volontariât, nassût dal impegn di volê metisi a fâ intervents di pulizie dal ambient e, par jessi plui precîs, di racuelte dai refudums che o cjatìn.
E je une azion impuartante di amôr pal teritori furlan che al è tant siôr di biodiversitât e di zonis di bielece rare, che a meretin di jessi difindudis e tuteladis miôr che si pues.
La nestre azion di fonde e je une vore semplice: o individuìn une zone particolâr che e à bisugne di jessi netade dai refudums, si armìn di sacs pes scovacis, manecis e altris furniments utii pal câs specific, o din dongje i refudums, ju metìn intai sacs e ju puartìn vie.
La “tradizion” e je chê di fâ une foto prime e dopo dal intervent di pulizie, par dopo publicâle e condividile sui social, par che ducj chei altris iscrits a viodin il risultât dal lavôr fat.
Clâr che e je lassade la libertât massime in chest sens: ognidun al sielç dulà che e cuant lâ, se fâ un lavôr individuâl, di cubie o di grup, e se publicâ o no lis fotos.
I intervents di pulizie a puedin jessi ancje “improvisâts” di cualsisedi volontari, ma tal stes timp cualchidun di nô si impegne, in maniere setemanâl se no ogni dì, a programâju: o publichìn sul grup la date, il lûc e l’orari de jessude, invidant a partecipâ ducj chei che ur interesse.
O crôt che un grant pont di fuarce, pai partecipants aes nestris ativitâts, al sedi chel di sintî di dâ il propri contribût in maniere dal dut libare e spontanie, cence imposizions e soredut sintintsi plui utii a nivel individuâl: chest ultin al è un fatôr fondamentâl, parcè che cussì ogni individui al sint di fâ dal ben no dome pal ambient e pe comunitât, ma ancje par se, par favorî un so insiorament personâl.”
__
“CEMÛT ISE NASSUDE LA IDEE DI METI IMPINS CHEST GRUP?”
“La idee e je nassude cuasi par câs, intal periodi aromai lontan dal lockdown dal 2020: fasint une cjaminade, mi è vignude la idee di cjapâ sù lis scovacis cjatadis dilunc vie il percors, e o ai pensât daurman a trop che al sarès stât biel e util se altris personis a vessin scomençât a adotâ il stes compuartament. Cussì tal mês di Setembar dal 2020 o ai decidût di vierzi “RipuliAMOci Challenge”, che al à tirât dongje dal prin moment un numar di personis tant plui alt di ce che mi sarès spietade: a vuê, a distance di aromai cuatri agns, o vin plui o mancul 7.500 iscrits, un numar in cressite costante. I ten a marcâ, però, che il grup Facebook al fâs plui che altri di “vetrine” publiche par chel che o fasìn: il valôr reâl al è intal risultât dal nestri lavôr, in ce che che si oten te realtât, inte sodisfazion che si sint rivant ai nestris obietîfs e condividint cun chei altris chescj moments biei, e il significât che a àn vût par nô.”
__
“A CUÂI OBIETÎFS SÊSO RIVÂTS FIN VUÊ, E CUÂI VÊSO PAL AVIGNÌ?”
“A son tantis lis concuistis fatis in chescj cuatri agns: par esempli, la popolaritât dal grup e je rivade a un nivel che nus à fats comparî in tancj gjornâi, fra chescj un di Milan là che la ativitât di “RipuliAMOci Challenge” e je stade descrite tant che esempli perfet dal furlan medi che devant di un probleme, impen che lamentâsi cence fâ nuie, si ravaie lis maniis e al agjìs in concret par risolvilu.
L’obietîf principâl che si sin metûts pal 2024 al è chel di organizâ events localizâts di pueste in zonis dongje di cors di aghe; intal specific, o sarìn atîfs a Midun, Marine Julie e a Staranzan.
Chescj intervents a son pussibii ancje in graciis dal cuarp forestâl dal Friûl, che ogni an al organize la iniziative “Parco nei parchi”. In chê ocasion si fasin ancje spetacui teatrâi, concierts e ativitâts di caratar culturâl, e pe edizion dal 2023 o sin stâts premiâts e nus è stade ufierte une donazion.
Di là di chest, o sin impegnâts simpri in plui manieris: par esempli, o colaborìn cui Comuns in ocasion des zornadis ecologjichis e o organizìn incuintris formatîfs intes scuelis.
O vin colaborât ancje cul Zîr di Italie Plogging, un event sportîf là che a partecipin tancj grups e associazions; si sin iscrits ancje nô e o vin organizât zornadis di racuelte di refudums che a àn clamâts dongje tancj partecipants.
Dal sigûr, si augurìn che chest nestri esempli si sparnici il plui pussibil ancje fûr dai confins regjonâi, e chest sot cierts aspiets al è za daûr sucedi. La nestre sperance e je che dut chest al sedi dome il principi di alc che in futûr al deventarà tant plui grant.” ❚
