La Cjargne in Armonie: al torne il Festival!

Chest an a son 26 Primeveris par Carniarmonie, il festival musicâl de Cjargne che e al cjape dentri no dome otime musiche, classiche, jazz, dal mont, ma ancje lûcs, paisaçs, architeture, storie e tradizions. Un grup armoniôs tra il vivi in mont e la espression artistiche e musicâl, tal sanc de nestre int. Ospits locâi, nazionâi e internazionâi, par une lungje programazion – une vere stagjon di trê mês – che e tache ai 15 di Lui inte plêf di Cesclans di Cjavaç, par finî ai 16 di Setembar inte sale polifunzionâl di Mueç.
34 concierts in totâl, comprendude la doi dîs de rassegne La lungje gnot des plêfs in Cjargne, ven a stâi musiche corâl, religjositât e gastronomie – une mense buine e puare – intes dîs glesiis plui antighis de Cjargne. Tantis altris a son lis ativitâts paralelis che la rassegne e propon. Conseis indulà lâ, ce visitâ, indulà fâ ativitâts sportivis, ricreativis, di bessôi, cui amîs o cu la famee, dulà gustâ, cenâ, durmî. Insome, une Cjargne che midiant de musiche si mostre in dute la sô bielece, a 360 grâts.
Se l’an passât, gnocis dI arint, la cuviertine dal biel librut dal festival, indulà che si cjate dut, e je stade fate biel a pueste dal pitôr Giorgio Celiberti, chest an, no dome la cuviertine ma ancje dutis lis fotografiis presintis in ogni pagjine, a son de cetant preseade fotografe Ulderica Da Pozzo. Jê e cognòs ogni cjanton de Cjargne che e risunarà ancje de sô lûs. Juste une anticipazion sul conciert di viertidure: il duo internazionâl Ramin Brahami e Massimo Mercelli. Dute la ricje programazion si le cjate tal sît internet www.carniarmonie.it
di Alessio Screm