La Cjargne che e resist

No son timps facii pe cooperazion in Friûl-Vignesie Julie: lis pachis che a stan cjapant lis Coop dal setôr de distribuzion a son sot il voi di ducj. Atenzion però a no gjeneralizâ, parcè che esemplis di sucès no mancjin. Baste cjalâ la Secab, la Cooperative energjetiche de Val de Bût, cooperative regjonâl leader tal so cjamp di ativitât. Un util di esercizi a fin 2013 di 833.033 euros; une produzion energjetiche di 44,6 milions di kWh, cressude di 622 mil kWh rispiet al 2012 e sigurementri pal an in cors il dât al sarà ancjemò plui alt. Ma, soredut, boletis de lûs che a son ancje dal 56 par cent plui bassis a pet dai distributôrs concorints, puartant vantaç pai socis di cirche un milion e 600 mil euros. Socis che a son cuasi trê mil, cun dipuesits di 7.224.874 euros.
“Cun plui di cent agns di storie – al dîs il president de Secab, Luigi Cortolezzis – o vin savût costruî une societât che e sa rapresentâ al miôr la filosofie mutualistiche dal mont da cooperazion, che in Cjargne al è simpri stât fuart. Massime, o crodìn al principi de autoproduzion e dal autoguvier dal teritori dal pont di viste energjetic”. Impensìnsi dal Invier passât, cuant che mieze mont dal Friûl e je restade cence corint par trê dîs par colpe des liniis saltadis cu la nêf e pai arbui che a colavin sui cablis, e intant però te stesse mont sîs comuns no àn vude nissune rogne. Chescj a jerin i comuns servîts propit de Secab. Che, tra l’altri, si è spindude ancje par judâ il gjestôr nazionâl a tirâsi di ca.
“Come la nestre, a son tredis lis esperiencis di cooperazion energjetiche tal arc alpin talian – al spieghe Cortolezzis – un model vincent sot l’aspiet pratic e economic, une cole pal teritori che o sin pronts a meti a disposizion di dut il rest de regjon”.
Il probleme principâl a son lis rêts di distribuzion, che par chel che al inten la Secab a son di sô proprietât, ma pal rest dal teritori al tocje passâ propit midiant dal gjestôr nazionâl. E chest al podarès fâlu dome la Regjon, se e decît che al podarès jessi un invistiment inteligjent pal doman, in plui che une maniere par esercitâ la proprie autonomie. Dut al dipendarà dal gnûf Plan energjetic regjonâl che, di ce che si spietisi, al varès di pontâ un grum su lis fonts rinovabilis.
“Dal sigûr, di bande nestre o podaressin ufrî competence e know-out – al fâs savê il president di Secab – metint in clâr    dut câs che i beneficis pai utents no saran propit ai stes nivei che a àn cumò i socis de Val de Bût”.
Tal stes timp, la cooperative e sta continuant a puartâ indevant il so progjet di eletrodot intierât cu la Carinzie, ancje in chest câs cuntune logjiche di sintiment che e ten dongje svilup e tutele dal ambient, no come cualchi progjet ben plui grues che la int di chestis vals no digjerìs. “O sin a bon – al comente Cortolezzis –, o stin spietant lis ultimis autorizazions di bande austriache e dopo o podarìn potenziâ il nestri sisteme di provision”.
In timps di invasions forestis tal cjamp dai servizis, une pussibilitât ulteriôr di disvilup pe Secab e ven da la aghe: di fat, une des centralinis idroeletrichis plui grandis che a son sul teritori, chê dal Fontanon di Tamau, e je la stesse che e furnìs l’acuedot de Val de Bût. “O sin vierts a dutis lis oportunitâts e aes colaborazion – al lasse intindi Cortolezzis –, dal rest tutele da la aghe e dal teritori a cjaminin pâr a pâr, e rispietant lis regulis des derivazion idropotabilis si pues fâ dut”. ❚
David Zanirato