Sfuei Mensîl Furlan Indipendent
Archivi de Patrie

La Cjargne che e resist

............

La passion prime di dut, l’amôr pe nature, pai animâi, pe cusine e la voie di provâ a scometi sul fat che ancje in mont si pues costruî alc di biel, alc di produtîf. Un dai ultins esemplis che a rivin de Cjargne al è che dal Agriturisim “Plan da Crôs”, la ativitât vierte in Val Pesarine, te prime frazion dal comun di Prât, Crôs, di bande di doi fradis zovins, Enore e Ingrid Gonano, 34 agns lui, 30 jê, che dal Jugn dal 2012 a àn decidût di molâ il lôr lavôr par partî cun cheste sfide.
“Nus disevin ‘Sêso mats, e se dopo us va mâl?’ – e conte Ingrid, prime di dut chest segretarie intun ufici -. ‘Parcè dovaressie lâ mâl?’, o rispuindevin noaltris, e di fat dopo doi agns o sin inmò chi, cuntune struture che e funzione, che e plâs, e che planc a planc o stin ingrandint”.
A confermâ che l’Agriturisim al à une cusine di cualitât e un servizi di invidiâ pe cortesie e pe semplicitât, al baste lâ a sgarfâ su TripAdvisor, il sît internet plui seguît pes recensions di ristorants e albiercs. Il mangjâ al è chel tipic cjargnel, lis cjamaris par durmî a son cuatri, viertis dut l’an, la viste dal paisaç e je di cartuline, cence dismenteâsi che e je ancje une stale pes vacjis, un piçul implant pe produzion dal formadi e naturalmentri l’ort. “Dome cul orgoi personâl e cu la passion, il nestri teritori e la nestre int a puedin lâ indenant a resisti – e conferme Igrid – e magari sveltint i progjets par permetinus di vê la bande largje in cjase, stant che par cumò e rive dome fin su pe strade….” ❚
✒ D.Z.