La aghe di mont e chê de basse ce fin fasarano?

Miracui da la aghe. Pe prime volte la int de Mont, chê dal Friûl di Mieç e chê de Basse furlane si strenzin adun par bataiâ in difese dai acuedots, dai fontanons, des risultivis e des fontanis. Il spauraç par ducj al è chel che tra un pâr di agns la multi-utility emiliane di Hera – che e controle za Amga-Acegas-Aps – e rivi adore a meti lis mans sore dutis lis aghis de nestre Regjon che fin cumò a stan cirint di resisti in gracie dal Cafc, dal Poiana e di Carniacque, pûr ognidune cu lis lôr rognis. Clamâts adun di Franceschin Baraçut dal Comitât pe tutele dal Bacin montan dal Tiliment, si son cjatâts tes setemanis passadis Adelvis Tibaldi dal Comitât pal Svilup dal Friûl Rurâl e Paolo De Toni, dal Comitât pe difese ambientâl da Basse furlane. Tal câs de Mont, si à tornât a domandâ che la gjestion dal servizi idric e torni in man ai comuns al massim a nivel di valade, lassant fûr dome la depurazion che e podarês jessi controlade a nivel comprensoriâl o provinciâl, un pôc come che al sucêt in Trentin. Inte Basse invezit, il probleme al è chel des stropaduris che si volarès fâ aes pompis che a tirin sù la aghe dai poçs, secont ce che al previodarès il gnûf Plan regjonâl di tutele des aghis. In chest câs, prime di lâ a cjastiâ ducj, si domande di verificâ lis straçariis di cierts implants e di meti man aes fognaduris di tancj paîs, che ogni volte che al slavine a van sot aghe. La bataie dai Comitâts e larà indevant e se no vignaran scoltâts a àn dit di jessi pronts ancje a creâ un moviment politic trasversâl par otignî sucès. ❚
✒ D.Z.