La Cjargne al naturâl pronte pe Vierte «Ogni stagjon e à il so savôr»: une gnove iniziative gastronomiche

E je une rêt di impresis cjargnele, che e cjape dentri struturis ricetivis, ristorants, agriturisims, aziendis agroalimentârs, societâts sportivis, ativitâts comerciâls. Durmî, gustâ, viodi, lâ ator, condividi esperiencis, vivi insome la Cjargne a 360° midiant di realtâts ecelentis, sparniçadis intes siet valadis cetant bielis de mont furlane. Si clame Naturalcarnia.
Presidente e je Chiara Gortani, architete e diretore dal Grand Hotel Gortani di Darte, struture prime rapresentante di cheste gnove aventure che e lee teritori, turisim, culture. Insiemi a jê, une schirie di professioniscj, responsabii di albiercs difondûts, b&b, ristorants, aziendis agriculis, realtâts sportivis, negozis, e v.i.
Lis peraulis clâf a son “il miôr de Cjargne”, e cui che al rive al pues discuvierzile vivint al massim lis sôs maraveis, compagnât di int che le cognòs benon. Zîrs in bici, o in moto, o a pît su pes monts, daspò ben mangjâ e bevi cui prodots gjenuins e tipics de zone, cualchi compre intes buteghis dal artesanât artistic cjargnel, ben durmî. Insome, come sintîsi a cjase. Tantis robis, pensadis pai grancj e pai piçui, che si puedin dutis discuvierzi lant prime a dâ un cuc sul sît www.naturalcarnia.it. E daspò, rivâ plens di entusiasim sù in Cjargne.
«In Cjargne ogni stagjon e à il so savôr» e je une des iniziativis plui interessantis che a àn metût sù par cheste Primevere. Une serie di cenis basadis su pe stagjonalitât dai prodots che la tiere e regale mês dopo mês, in compagnie di cogos, produtôrs, artiscj e personaçs dal teritori, intun clime di autentiche ospitalitât. Un progjet inmaneât cul Fîl dai Savôrs, Slow Food e la Associazion Taliane Sommelier dal Friûl. Il prin apontament al è ai 25 di Març cu la cene di magri al Fogolâr di Verzegnis, il secont ai 29 di Avrîl cu lis jerbis dal bearç al Naunâl di Priole di Sudri, il tierç ai 27 di Mai cu lis jerbis di mont li di Pierute a Dieç. Il rest, lait a discuvierzilu. Lait sù in Cjargne! ❚
✒ Alessio Screm