La autonomie energjetiche ise pussibile?

Puedial il Friûl rivâ ae autonomie energjetiche, timp une trentine di agns, svilupant la produzion di energjie gjavade fûr di chês risultivis tant che il soreli, l’aiar, la aghe o dai refudums che si puedin tornâ a doprâ?
«No, autonomie no, impussibil. Dut câs si à di incressi une propension pe energjie verde bielzà ben inviade in Friûl, diminuint cussì la dipendence dal forest». Al è stât chest, in struc, il messaç saltât fûr de Lezion di autonomie davuelte ai prins di Març a Sant Laurinç dal Lusinç su iniziative dal Laboratori di Autonomie cu la partecipazion di Matteo Mazzolini, diretôr de Agjenzie pe energjie F-VJ e Fulvio Stel, professôr di Fisiche de atmosfere te Universitât di Triest.
Par chest, e conte Elisabetta Basso dal Laboratori, «il Friûl al varès di vê grande atenzion par doprâ miôr e di plui la sô aghe par fâ energjie e il soreli. Ancje l’aiar al pues dâ sodisfazion». Confermât che tal mont produtîf e je la industrie a supâ un slac di energjie; invezit la agriculture e je la ocupazion che a ‘nt domande di mancul. Ancje lis cjasis, però, a fruin un grum di energjie. Inalore, al è stât sotlineât, bisugne che dongje de produzion alternative si ciri di consumâ mancul pussibil, cun compuartaments sparagnins e intervents sui fabricâts: dal cambiâ i sieraments a fâi il capot ae cjase, fintremai a meti sù i implants pal cjalt e pal frêt plui economics in cont di energjie.
Par chest procès, un sburt bon di fâ la diference «al è il supuart de istituzion regjonâl aes fameis par che a intervegnin a miorâ di un pont di viste energjetic lis lôr proprietâts. Alc al è stât fat ma bisugne lâ indevant e fâ di plui», e siere Basso puartant lis conclusions dal dibatiment.
Ancje parcè che i furlans si son dimostrâts sensibii, come che al mostre il fat che i implants fotovoltaics e dal solâr termic a son calâts tai ultins timps ma no tant che si podeve spietâsi cul vignî al mancul dai contribûts in merit. In sumis, al pâr che in Friûl si invistissi te tutele dal ambient, e duncje dal om, ancje se a calin lis agjevolazions economichis. (A.L.) ❚