A Orçan, ancjemò di un grum di agns, e je une bande che e va a sunâ ator pal Friûl.
I components de Bande di Orçan a son di dutis lis etâts.
Une volte, chei de Bande di Orçan a jerin stâts a sunâ a Cordenons e a jerin lâts a durmî a sere tarde.
◆ Par mateç, cualchidun al veve fat bevi un tai di masse a Martin, il plui zovin di ducj, che al veve imparât a sunâ il so strument tal Conservatori di musiche di Udin.
Cussì Martin al jere tornât cjase dut legri pe cjoche che al veve intor.
Si butà a colp parsore dal jet ancjemò vistût cence molâ di cjantâ la vilote La ligrie e je dai zovins e no dai vecjos maridâts.
Si indurmidì di bot, nancje pensant indulà che al veve lassade la sô armoniche.
◆ Vie pe gnot, mieç paîs si sveà par vie dal rumôr di une armoniche.
Ce jerial sucedût? Al jere sucedût che Martin al veve dismenteade la sô armoniche intun prât e che le vevin cjatade une clape di babuins.
◆ Un di lôr si jere metût a fracâ i tascj e cun chei rumôrs al veve dismovût ducj.
Si sveà ancje Martin che al corè subit in chel cjamp a cjapâ sù la sô armoniche.
Martin al cjatà i babuins e al capì che a jerin stâts lôr a sunâ il so strument e al disè:
“O vuei propit ringraciâus di cûr par vêmi fate cjatâ la mê amade armoniche!” ❚
La armoniche
Roberto Meroi
