Judâsi di bessôi

Il bonodôr dal toscan che si sfantave dilunc dal coridôr dal Liceu “Jacopo Stellini”, compagnât di une vôs di salvan, a nus pandeve che pre Checo al steve rivant. E po, si viodeve la sô muse ruane e la gjachete nere neveade di schelfe e plene di plumutis minudinis minudinis, chês dai siei reclams di Montenârs.
◆ Al jere prof di religjon ma, plui che di religjon, nus fevelave de storie dal Friûl e de lenghe furlane. Storie e lenghe che ducj o sin clamâts a sostignî cun passion e coraç, nus diseve spes.
◆ E in merit, une dì, nus contà la storiute di Lamissio, gjavade fûr de Historia Langobardorum di Pauli di Warnefrit. Il re Agjelmunt, biel che al jere in viaç, al rivà intun grant sfuei di aghe turbie, dulà che une besteate di mari e veve puartât a inneâ i siei siet frutins. Il re, stant a cjaval, si fermà a cjalâ chescj puars cuarpisins e, cu la lance in man, ju voltolave sotsore par viodi se a jerin propit muarts. Ma ve, un di lôr, iniecta manu hastam regiam conprehendit, slungjade la manute al brincà la lance dal re. Cetant maraveât, Agjelmunt al ordenà di tirâlu fûr e che al fos dât a une nene, e arlevât cun ogni cure. E, dal moment che lu veve cjatât tun sfuei, che in lenghe langobarde (e ancje tal furlan di vuê) si dîs lama, lu clamà Lamissio.
◆ Cui agns, il fantaçut al deventà un vuerîr cetant fuart e indaviodût, e po dopo re ancje lui. Pre Checo al voleve dînus che te vite, par rivâ insom, e vûl sì un pocje di fortune, ma bisugne cetant scombati e soredut judâsi di bessôi. E cui siei voi di flame al diseve: “Visiti fantat, che se no tu sunis tu la tô cjampane, nissun le sune par te!”
◆ Intant, ancje il bidel Cjarandin al sunave la sô cjampane. Finît, e ducj a cjase.
◆ Pre Checo al poiave alore te borse nere la sô Bibie bilengâl dal Merk, grêc e latin (in spiete di chê par furlan) e, alçantsi de cjadree, cu la man ledrose al parave vie de catedre dut, cinise, schelfe e plumutis. Ma no i siei pinsîrs. ❚