Sfuei Mensîl Furlan Indipendent
Archivi de Patrie

INTERVISTE. Cavallo: «Il Stât che nus torni il malcjolt»n spiete de Rai, ae fin dal 2018 e je nassude EjaTV-Sardegna2

............

Cavallo: «No si dîs nuie dai 3,5 miliarts in plui gjavâts
dal 2011 al 2018 a pet di chês altris Regjons speciâls»

Nol è dut aur chel al lûs. Giorgio Cavallo, ex conseîr regjonâl, tra i esperts plui atents in merit ai temis de autonomie dal Friûl, al è tranchant in merit al acuardi Fedriga-Tria che al à cambiât i tiermins dai prelêfs straordenaris dal guvier ai belançs dal Friûl-Vignesie Julie par fâ front aes dificoltâts de finance statâl.

__

Cavallo, parcè tant seticisim?

«Si viôt che, dal president Fedriga a ducj i assessôrs, a son daûr a recitâ un copion che al va daûr di une strategjie comunicative precise indreçade a enfatizâ i risultâts dal acuardi resint, sbandierant numars che in se no son fals, ma intes sieltis dai timps di fâ i confronts, a presentin la situazion tant plui rosade di chê che e je».

__

Provìn a sclarîlu plui intal detai ai letôrs da La Patrie dal Friûl.

«Il mantra principâl des declarazions e zire ator dal sparagn di 834 milions che si otignarès a pet dal acuardi precedent Serracchiani-Padoan. La prime osservazion e je che, dal pont di viste des circostancis economichis e politichis, a son dôs grandecis incomparabilis. Intal 2014, cuant che la presidente de Regjon Serracchiani si è acuardade cul ministri des Financis Padoan, si cjatavin propit tal centri dal gorc de crisi economiche taliane e de emergjence finanziarie dal Stât. La pression esercitade su lis Regjons e jere plui alte di chê di vuê in maniere incomparabile. Intal 2015, lis risorsis gjavadis in vie straordenarie dal guvier al belanç dal Friûl-Vignesie Julie, a son rivadis ae cifre record di 1 miliart e 198 milions, daûr dai dâts uficiâi de Cort dai Conts intal so judizi di parificazion dal belanç consuntîf regjonâl. Dopo, i viersaments a son calâts di plui o mancul 100 milions ad an tacant dal 2016. Un altri tai di 120 milions al jere previodût za pal 2019 dal rinovament dal acuardi cul guvier intai ultins mês de presidence Serracchiani. Se un confront si vûl fâ tra passât e futûr, al sarès stât plui coret gjavâ almancul il 2015, che al è stât straordenari a ducj i efiets, invezit si ‘nd à tignût cont par fâ slusî in mût artificiâl il risultât otignût di Fedriga. Il sparagn reâl nol è di 834 milions, ma di 450. Pôc plui de metât».

__

La assessore Zilli a La Patrie dal Friûl e à fevelât di un câl dal 2 par cent de pression dal guvier su lis financis regjonâls, dal 14,5 par cent al 12,5 par cent. I risultial?

«I 834 milions a son l’unic numar in assolût che al ven furnît de zonte, intant che par ducj chei altris si fevele di percentuâls, che si rivin a decodificâ cun mancul facilitât e control. Se nô o tradusìn in numars chest câl dal 2 par cent, di fat nol vûl dî nuie altri che il scont di 120 milions za otignût de Serracchiani dal ministri Padoan pal 2019, che si slargje ai agns 2020 e 2021. Di fat, duncje, no si cjatìn devant di un grant miorament, ma di une situazion di continuitât».

__

Ma intal acuardi Fedriga-Tria, viodial ancje elements positîfs?

«Dal sigûr. Par esempli la promesse di un flus di 400 milions di invistiments dal Stât in regjon pal trieni, in materiis tant che la sanitât (pai furniments), lis scuelis e lis stradis. Al è interessant osservâ che cualchidune di chestis materiis (fale i furniments pe sanitât) e je za di competence primarie de Regjon, che duncje midiant des compartecipazions ai tribûts e varès za di disponi di chês risorsis cence dipendi dai riparts dal Stât. Aromai di agns si va indenant cussì: lis oparis publichis primariis a son za di competence regjonâl, ma si fasin dome se il Stât al met i bêçs».

__

Dopo viodial altris elements interessants?

«Di sigûr l’impegn dal Stât di no fâ gnûfs tais fintremai che la percentuâl di prelêf ae nestre Regjon no sarà metude in linie cun chê di chês altris Regjons a statût speciâl. Cussì come che e je positive la concession de potestât regoladorie ae Regjon su lis impuestis locâls di caratar imobiliâr e la tratative par tornâ a une compartecipazion tributarie su la butade Ivz ai 9 decims. Dut câs, a son dutis promessis che a laran tradusudis in ancjetantis normis di atuazion dal Statût regjonâl midiant de azion de Comission Paritetiche e al sarà ben lei cun atenzion i tescj juridics. Par altri, nol è stât fat cognossi nancje il test complet dal acuardi Fedriga-Tria, duncje si resone dome su declarazions politichis. A ogni mût, o ai lassât di pueste par ultime la critiche plui pesante che o vuei fâ a chest acuardi che si base no tant su lis declarazions esplicitis, ma sui cidinôrs».

__

Ce si varessial di fâ par cjatâ fûr une ecuitât cun chês altris Regjons speciâls? La assessore Zilli a La Patrie dal Friûl e à certificât une pression dople sul nestri belanç regjonâl.

«Ducj i resonaments dal president Fedriga a son proietâts sul futûr. Ma se intai agns passâts, cemût che lôr a certifichin cui dâts te man, e je stade une disavualance fuarte di prelêf cun chês altris Regjons a statût speciâl, parcè no si pretindial dal Stât che al torni il malcjolt? Cheste diference ise justificade in cualchi maniere in tiermins di ecuitât tra i citadins? E se no lu è, a trop rivie cheste no ecuitât? Se dal 2011, cemût che si dedûs, o vin paiât plui o mancul 7 miliarts di prelêfs straordenaris al Stât, cheste disavualance e rivarès a plui o mancul 3,5 miliarts. E une part di chescj e varès vût di jessi stade metude in bande pal inviament dal federalisim fiscâl, ma nol è stât cussì. O vin di sierâ cheste partide cuntun sempliç e adatevul: “Cui che al à dât al à dât, cui che al à vût al à vût”. Calcolant i dams che chescj prelêfs a àn fat, cemût che a dimostrin i dâts macroeconomics, la zonte Fedriga e varès di domandâ al guvier Conte il varament di un plan straordenari di disvilup dedicât par esempli ae manutenzion dal teritori e al recupar de edilizie. Cheste e varès di jessi la bataie fondamentâl de Regjon Friûl-Vignesie Julie pai agns prossims». ❚

Roberto Pensa

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +