Sfuei Mensîl Furlan Indipendent
Archivi de Patrie

INCHIESTE: IL FRIÛL CHE AL VIGNARÀ. La Patrie tant che une Disneyland grandonone li che ogni dì si recite la storie

............

Friûl indipendent
tal gnûf romanç di Tullio Avoledo

Tachìn de robe plui biele di “Furland”, che Tullio Avoledo al ambiente dopo dal 2023: al è indipendent e la lenghe uficiâl e je il furlan. E no par costrizion, ma parcè che la marilenghe intai agns e je deventade cool: e je trendy, juste come il frico, che si servìs  intai miôr ristorants di dut il mont, di Londre a New York, parcè che al ven di une tiere dulà che ducj, ma propit ducj, a volaressin lâ.
Furland, di fat, e je une destinazion turistiche invidiabile. Vittorio Volpatti, il president di chest Stât che nol è un Stât (ma une Spa inondade di finanziaments di invistidôrs di dut il mont, de Cine ae Americhe cun Elon Musk), al à rivât a rindilu un paradîs turistic, net intal paisaç e selezionât inte int. Un paradîs cuntune carateristiche uniche: al fâs rivivi la sô storie tant che un grant “zûc di rûl”. Cussì Triest e je stade in buine part sdrumade: a restin dome Borgo Teresiano e Miramare dulà che desenis di miârs di nostalgjics dai Asburgo a puedin vivi la grandece dal Imperi dai timps di Marie Taresie a chei di Franz Joseph. A Aquilee si torne indaûr ai timps dal Imperi di Rome, a Voleson si torne al pericul dai “Turcs tal Friûl”, a Cividât si fâs dut come se si fos ancjemò te ete dai Langobarts, la Cjargne si mude in Kosakenland come tal 1944. Int di dut il mont e paie un grum di bêçs par vignî tal paîs che al à ricreade, in maniere meticolose e intrigante, dute la sô storie. Ducj i furlans dut câs a àn volût (o scugnût) paiâ un presit: deventâ i protagoniscj, ma cetant plui spes lis comparsis, di un business miliardari che ju ten come in ostaç.
Saressial pussibil? La tesi dal scritôr di Voleson, za autôr di libris di grant sucès tant che “L’elenco telefonico di Atlantide” o “Breve storia di lunghi tradimenti”, e je che vuê la opinion publiche e je une vore plasmabile, e che «a son za intal mont grandis inovazions sientifichis che nus permetaressin daurman di rivâ su Marte. No plui cui fonts e cu lis risorsis dai Stâts nazionâi, che a son simpri plui in crisi, ma cun chês dai privâts che a àn plui disponibilitât e no àn a ce fâ cu la burocrazie». «La civiltât – al spieghe – e je ce che o sielzìn di jessi, di lei, di mangjâ, ma se dutis chestis robis a son prefabricadis e la sielte e je dome aparente, al è pront il delit perfet. O deventìn imprescj di une volontât plui alte che nus fâs crodi di jessi libars e fortunâts di ce che o vin e di ce che o sin». “Furland” al realize une sintesi che e fâs ducj contents: come il consumisim dulà che ducj o sin “libars di scugnî comprâ”, ma sclâfs di un stîl di vite che nol rispuint a une dibisugne, ma le cree.
Cence stâ atents, cun cheste maniere di resonâ e di puartâ indevant lis nestris vitis dì par dì – nus invide a considerâ “Furland” – o podaressin sveâsi une dì come stars di un “Truman show” che nol à plui nancje bisugne de television. «I judizis su chest libri, sedi de critiche che di cui che lu à let, a son une vore bogns – al comente Avoledo – e forsit al è propit parcè che a sintin cheste storie no come une vicende fantasientifiche o distopiche ae Orwell, ma tant che un risi concret che in timps no masse lontans al podarès ancje realizâsi». Intune vecje interviste al veve dit: «Se un om dai agns ’50 dal Nûfcent al rivàs a viodi ce che al è sucedût in mieç secul, nol crodarès ai siei voi: clonazion, cambis di ses, rus deventâts miliardaris, avions che a butin jù palaçs di 110 plans, atentâts cul gas nervin. Un mont ribaltât». E se vuê il cambiament al è simpri plui svelt, parcè varessino di crodi ae impussibilitât di Furland?
La storie di Avoledo e à il merit straordenari di fâ viodi cemût che si pues colâ intune ilusion cuant che si sacrifiche la dignitât di popul al benstâ economic. Ma e je ancje «un apel a imbastî une riflession su la necessitât di resonâ prin di vendisi a di chei che a rivin tant che missionaris salvifics, ma a vuelin dut fûr che il nestri ben», al spieghe l’autôr che tes elezions dal 2018 si è presentât cul Pat pe Autonomie propit par sotlineâ cemût che «une rivincite de dignitât e pues rivâ dome dal bas, di esperiencis che a partissin dai teritoris come il nestri dulà che une cussience di comunitât no je stade ancjemò bandonade».
E in “Furland” propit cheste cussience e devente un fondament di chest esperiment inovatîf. I furlans a acetin di meti sù un Parc divertiments grant come dute la regjon, dulà che ogni dì a vuadagnin interpretant la storie dal lôr popul, ma a rinunziin ancje a un toc di libertât. Fin cuant che… alc al tache a lâ stuart. Lis atrazions di Furland a vegnin sabotadis simpri plui dispès di un manigolt che no si contente dome di fâ dams, ma al met in ridicul dute la situazion e al sburte tancj turiscj a no vignî plui. I invistidôrs a son preocupâts e a afidin lis indagjins a Checo Salvador, un furlan di tierce gjenerazion tornât de Australie: Furland di fat al jere deventât tant che Israêl pai Ebreus tal 1948, e al veve tornât a tirâ dongje ducj i furlans de Diaspore.
Ae fin Salvador (di non e di fat?) al rivarà a risolvi il misteri e a scuvierzi cui che al sabote lis maraveis di Furland: ma la conclusion e je pardabon sorprendente. In cheste «utopie ambigue», come che le definìs Avoledo, la soluzion e pues jessi une biele o une triste fin, a seconde di ce che un al pense. Ma il tentatîf dal scritôr al è chel di dimostrâ che «ce che tancj a disin di fâ tal non dai furlans o pal ben dai furlans in realtât al à ben altris logjichis». L’autôr di Voleson al veve za fate un riflession su chest teme intal so romanç “Lo stato dell’unione” dulà che si ocupave di une tiere no masse lontane dal Friûl guviernât di Alessandra Guerra, che e cjalave cun bon voli ae Austrie di Jorg Haider. «Vuê, tal lôr puest a son Salvini e Kurz, ma lis robis no son cambiadis», al siere Avoledo. «Al sarès za alc che i furlans si inacuarzessin, come che ur domandave Pasolini, di vê une storie. E chest za ju judarès a jessi plui fuarts e braurôs cuintri di chei che a vuelin doprâju». E magari cussì, une dì a rivaran a fâ un “sium” su lôr avignî, sperìn un tic plui libar e positîf a pet di chel de «utopie ambigue» di Furland. ❚
Walter Tomada

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +