INCHIESTE. «Il disvilup turistic nus passe denant, ma no si ferme

Sindics dal Cjanâl dal Fier sodisfats,
ma a domandin a dute vôs un impegn de Regjon
Si ferme a Mueç la maravee e la sodisfazion dai cicloturiscj di mieze Europe. «Propit inte vecje stazion di Mueç – nus sclarìs il sindic Giorgio Filaferro – si ferme la ciclovie Alpe Adria. Cui che al vûl lâ indevant viers Grau o dome tornâ a cjapâ il tren a Cjargne par tornâ a cjase e cjape in cualchi câs la biele, ma intorcolade vecje strade traviers Cjampiûl, ma pe plui part e fronte lis curvis pericolosis de statâl Pontebane, dulà che lis machinis a corin sveltis tant che intun autodrom. In chest periodi o fevelìn di centenârs di bicicletis ogni dì. Di agns o visi la Regjon che li, in chel pont, al pues sucedi alc di grâf e al è tant urgjent intervignî prime che al scjampi il muart. Ancje par fâ rivâ a Mueç la ciclovie o ai spudât balins!».
Ma chest nol è l’unic cruzi dal sindic di Mueç: ancjetant impuartant al è il desideri di fâ fermâ sul teritori almancul une piçule part di chel flum imens di bicicletis che al va jù di Nord bande l’Adriatic. «Une vore di cicloturiscj a presein la nestre val pal so aspiet salvadi e tancj altris a podaressin scuvierzile. E je une ocasion di aur, ma par disfrutâle al covente un progjet intun orizont temporâl di 5-10 agns. Par chest o soi daûr a coordenâ un grup di 5 Comuns insiemi al Ent Parc des Prealps Juliis – al conte Filaferro – par ufrî dôs, trê propuestis turistichis par ogni comun e risolvi il probleme dai puescj jet che a mancjin. Cun di plui, o vin a disposizion un milion di euros dal progjet Interreg Parkade. L’intindiment al è di passâ la dificoltât a visitâ i nestris teritoris par vie des pendencis altis des stradis se si va fûr de ciclovie. O previodìn dilunc dal percors il nauli di mountain bike a pedalade assistude eletriche par passâ chest ostacul e scuvierzi lûcs maraveôs tant che i plans di Montâs. Dome a Mueç o vin 160 chilometris di piste par mountain bike tignûts une vore ben dai apassionâts».
Chel altri probleme al è chel des struturis ricetivis e il sindic di Mueç al à une propueste. «O vin une vore di cjasis bielinis – al sclarìs Filaferro -, ristruturadis daspò dal taramot, ma cumò vueidis. Pitost che creâ gnûfs bed&breakfast che al domande luncs timps burocratics, si podarès scomençâ cul afitâlis sul portâl online Airbnb. Une formule semplice e imediade».
«A son doi dâts inconfutabii – al dîs il sindic di Pontebe Ivan Buzzi -: i passaçs a son in aument continui, però i operadôrs forescj a son tant plui pronts di nô a organizâju. La place di Pontebe di Mai a Setembar e je plene di centenârs di cicliscj, ma a puartâju chi a son dispès agjenziis slovenis e austriachis che ju movimentin cu lis lôr corieris furnidis».
Po, al è il probleme de sigurece. «O stin lavorant su cualchi pont pericolôs de ciclabile – al splee Buzzi – e il lavôr di fâ al è impuartant ancje pe gjestion ordenarie, tant che par esempli il sfalç. O stin cirint di ativâ un percors comun cu la Regjon e i ents interessâts, ma a son une vore di dificoltâts burocratichis. O stin cirint di fâ une regjie uniche e o sperìn che la Regjon nus dedi une man, ancje economiche».
Un altri pont debil e je la ospitalitât, une vore carente, tant che la valorizazion des atrativis che i cicliscj a cjatin ator de Alpe Adria, intes valadis laterâls e intai percors ciclistics secondaris. «O vin une desene di bed&breakfast che a lavorin ben, ma o volaressin creâ un ostel par cicloturiscj e une aree par camping. Se di no al reste un turisim di passaç che al lasse pôc al teritori. La passade Sierade o ai puartât i miei operadôrs a S. Cjandit par capî cemût che li, in Sudtirôl, a àn fat dal cicloturisim un volan vêr di disvilup. Al sta vignint fûr un gnûf bant par bed&breakfast inte nestre aree interne, dulà che a son previodûts ponts in plui par cui che al cree ancje servizis al turist, tant che par esempli une piçule aree wellness o une aree oficine pes bicicletis». ❚
Roberto Pensa