In memorie di pre Antoni Beline a 11 agns de muart

Al à lassade une olme profetiche te glesie e te culture furlanis
A van indevant ancje chest an diviers apontaments tai comuns di Basilian e di Listize in memorie di pre Antoni Beline tai 11 agns de muart, par iniziative dal Comun di Basilian, di Glesie Furlane, dal Grop amîs di pre Toni e de Associazion culturâl “Colonos”, e cu la colaborazion di tante int e di associazions furlanis. A son in program moments di preiere, di incuintri e di riflession par tignî vive la memorie di cheste grande e singolâr figure di om, predi, mestri e inteletuâl che al à lassade une olme profetiche te glesie e te culture furlanis.
Daspò de cjaminade libare “Pai trois di pre Antoni” dai 14 di Avrîl a Visepente, che e à vierzût la schirie di iniziativis, sabide ai 21 di Avrîl, aes 10 di matine, la biblioteche civiche “Pre Antoni Beline” di Basilian e darà acet ae cunvigne “Pre Antoni al vîf” cun Irene Locatelli che e presentarà in anteprime il so libri “Una scuola possibile. Il pensiero e l’esperienza di Pietrantonio Bellina”, publicât di Glesie Furlane; Bruno Forte e Silvana Schiavi Fachin, che a fevelaran dal teme “Predis e mestris scomuts” (Forte su pre Beline e pre Lorenzo Milani, e Schiavi Fachin sul predi furlan e su Tullio De Mauro).
Domenie ai 22 Avrîl, aes 10 di matine, si ricuardarà pre Beline tal cimitieri di Visepente, denant de sô tombe. Lant in glesie, e je previodude une soste li de lapide poiade sul lûc de muart. E aes 11 e un cuart, te plêf di Sante Marie Assunte, e sarà celebrade une messe par pre Antoni. Une messe in so ricuart e vignarà fate ancje a Vençon, te plêf di Sant Andree, domenie ai 22 Avrîl, aes 5 dopomisdì. Po al vignarà presentât il libri di Locatelli su pre Beline.
par cure de redazion