In memorie dal pitôr Nando Toso, artist risiervât ma tant valevul

La Provincie di Udin è a inmaneât un grant progjet dedicât al artist furlan Nando Toso, tacât tal Novembar stât, che si siere cul conciert dai 14 di Mai, diret dal mestri Valter Sivilotti e cul cjantautôr Pietro Sidoti (che al jere il nevôt), te suaze di Vile Savorgnan di Flambri a Talmassons. Ma cui jerial Nando Toso? «Nassût a Udin tal 1921, al veve un trat nobil tal dissen, e un talent pal ûs dal colôr.
Grandissim colorist, ritratist ecelent, nus à lassât oparis mestris tant che paisazist» al spieghe il professôr Gianfranco Ellero. «Toso nol amave lis modis de piture dal timp, al cirive une sô strade. Chest però nol vûl dî che al jere sierât, che nol cjalave fûr dal so ort. Al contrari: al jere un fi dal Nûfcent, ben informât su ce che al sucedeve tal mont, cuntune vision une vore vierte. Te sô opare no je dome la influence taliane, ma chê europeane. Si cjatin Cezanne, i Fauves, Vlaminck».
figure impuartante pe art furlane, epûr mancul cognossude di altris. parcè? «Al jere un personaç che si faseve cognossi pôc. Nol à mai tirât pe gjachete i critics par une recension e al à fat dome 15 mostris personâls in 65 agns di ativitât» al conte Ellero. «Nol à pocât di ogni bande par rivâ al sucès. Ma mai confondi il sucès cui valôrs: chescj dispès no àn popolaritât». Om risiervât, laboriôs, seri, ma ancje ironic, nus à contât une persone che i à vivût dongje: «Al voleve jessi clamât Nando, no “siôr”. Ma no rivavi, par rispiet. Fin che une dì mi à rispuindût: “Sì, Diu to”. Di chê volte lui ai simpri e dome clamât Nando».❚
✒ Natascia Gargano