Sfuei Mensîl Furlan Indipendent
Archivi de Patrie

In Gravo, a nodâ

............

Finidi’ li scolis, al dopodemisdì a se lu passevo in Gravo, tal fresc de l’ago ch’a corevo. A nodâ. Canais de Grîs, de Malnîs, de Giais, de Montreâl, ’peno finì de mangjâ i montevo in doi in bicicleto, e i partivo.
Cualchidun al zivo su pa la ribo de Magreit fin davou la galerìo cui suamans ator al manubre. Cualchidun invesse al pedalevo su par Castelu, e po ju fin al punt de Rovenis. E al sabu, par lavâsse, i se partevo ancjo ’l siampo e ’l savon ta ’na borso de telo. Li bicicletis i li lassevo in bando dela strado, poiadis tai paracjars. E i zivo ju pai trois.
Chei ch’i ero ’rivâs dala galerio de Magreit i zivo a nodâ “Davou Cjascel”, dulà che la Selino a sbatevo ta ’na ribo e a fasevo una poscjo cu l’ago un po’ pì alto.
“Sconfòs” al ero ’l post cun pì zent, ch’a se podevo mête i suamans tal erbo e no soro i clas. Da li altri bandis un clap ch’al te infastidivo te lu cjatevis senpre.
Un po’ pi ’n ju, versu ’l mont Faro, a ero “La Nave”, un biel post par nodâ, ma la corente a ero masso fuarto. De nouf de ca i ero “Li Lastris”, periculosonis, talmente lissis ch’a se sbrissevo ’peno poià un pié, e ch’a no se rivevo a tornâ su da l’ago.  Chei ch’i ero ’rivàs da Castelu i zivo ju par un troi scomodon primo dela galerio ch’a ero dulà che adés a è la digo de Ravedis.
E i podevo zî a nodâ uvì de la “Piéro Mangiadòrio” poiandu i suamàns tal savalón ch’al fasevo ’na specie de spiagiùto.
Da che altro bando, versu ’l Faro, al ero ’l “Rondolàr”, al póst dei tufi. A se cugnevo traversâ, e zî su fin al figàr, deis metri soro ’l pêl del’ago. E pó’ butâsse iù a bombo o, i pì braus, de cià standu atens ali spansàdis e a no gratâsse cui clas tal font.
Al punt de Rovenis al fasevo da cunfin. Pi ’n ju del punt a ero la “Pissavacio”, un po’ de ago no tant alto, buno però par nodâ, ma ’l ero ’l post dei maniacìns, de chei de Manialivre, dei forest.
Al pore Beno, poeta de Montreâl, poc primo de murî al me à regalà una fotografio a colous del “Rondolâr”, dulà che par ans ài viert jo la stagjon dei tufi.
A no se stevo senpre in ago, che l’ago dela Selino a è ancio ’des fredono. Ma fin che i lavris i no ero deventâs viola a no se vignevo fou. Po’ a se stevo al sorele. E po’ de nouf tal’ago. Fin che li dombrenis i se slungevo e ’l sorele a no’l ’rivevo pì. Finìs cu ’na poesio de trento ans fa inte grafie di chê volte:
A nodâ
ziàn in gravo
al sabu
cul sciampo e cul savón
ma dal Figàr
se buteàn in pócs
– ogni an cualchidùn al se neghèvo –
dodis metri de póuro
ch’a me sclopèvo ’l cóu
e ’dés
stradis dìghis galerìis
pócio ago
e spòrcio:
uvì del Rondolàr
a no’l và pì nissùn
nàncio a murî ❚
✒ Di Toni De Biasio* (Test scrit in variante di Montreâl (PN) di Toni De Biasio, poete. Si ringrazie Pier Carlo Begotti pe colaborazion).

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +