Nô Cjargnei di sigûr cence l’intervent de Regjon no si saressin insumiâts di rivâ adore a fâ rivâ sul Çoncolan une tape dal zîr di Italie! Chest al è stât un event che al à fat cognossi il lûc a plui di 300 milions di personis. Come risultât o varìn une schirie di cicliscj, di passaç, che a vignaran di ogni bande dal mont a provâ cheste salide fûr dal ordenari. Ma il Turisim isal chest? Al è ancje chest.
No intint slargjâmi su argoments di specialiscj, ma mi limiti a fâ cualchi considerazion dome cu la sperance di no incuguiâsi a gjoldi il biel risultât de comunicazion e de positivitât di un investiment, che come un furlan, lât sù a viodi il zîr, mi à dit: “Che al sei costât ce che al è costât, ma a son stâts bêçs ben spindûts”. Nol sucêt spes di sintî alc dal gjenar. Volìno cjacarâ di turisim in mont? Si varès di partî confrontant cemût che si vîf la economie dal turisim chi di nô e te confinante Carinzie. Si cjataressin un grum di situazions similis: la mont, il clime, la nêf, la mancjance di industriis, lis dificoltâts di traspuart. Di là però al samee che il turisim al sei stât cjapât tant che une risorse, tant che une sorte di industrie, ca di nô, invezit il turisim al interesse dome a chei che a àn i albiercs, di fat no si viôt di nissune bande cartei “Zimmer Frei”, come in cuasi ducj i piçui paîs de Carinzie. “Vivere in Carnia si può” al diseve un slogan dal ultin incuintri diocesan sui problemis de mont (tal 2000) si pues dî che “fare turismo in Carnia si può”. Di sigûr, ma di ce bande scomençâ?
NO VIN DOME POLENTE E FRICO_Si partìs simpri cul ingolosî la int : Fieste dal salam di mont a Enemonç, dal radic di mont a Darte, dal pan a Dimpeç, jerbis di primevere a For Disore, fieste dal persut a Sauris, “sagra del malgaro” a Davâr, fasìn la mede o “magia del legno” a Sudri, “palio des cjarogiules” a Paluce, par finîle ai 19 di Avost cu “la sagre dai mistîrs, intesi come tradizioni e mestieri delle valli d’Incarojo,” e tantis altris sagris, par no menzonâ une slavinade di corsis in mont, regjonâls o nazionâls. In sumis la int di planure no sa ce sielzi par scjafoiâ la domenie in Cjargne. Podaressin sielzi invezit dal frico la luianie o la cueste infumade, ma no simpri si è in condizion. Mi domandi ce che al podarès sucedi pal nestri turisim gastronomic se, cumò, che no tu pues bevi plui di doi tais di vin a metessin ancje un limit sui trigliceridis e colesterôl?
Pal passât la Cjargne e jere aghe, turisim, piçule agriculture e emigrazion. Cumò la aghe e je stade, in part, pocade tai tubis de Secab, une cooperative centenarie, de val de Bût, che e prodûs energjie eletriche cuntun benefici impuartant pal teritori.
La piçule agriculture e je sparide, al è restât dome un non che al fas vendi: LATTE CARNIA, ma ce lat? Ma ce Cjargne? Une volte il turisim in Cjargne al voleve dî vilegjants, coloniis di fruts che si sistemavin tes scuelis, cence tantis pretesis. In cuasi dutis lis cjasis, ancje se si veve un gabinet in comun, si fitave ai siôrs vilegjants che a judavin la economie de famee. Dut di un colp, cuant che lis cjasis a scomençavin a jessi plui completis cun tant di bagn e di cusine, no a miezis , i vilegjants a son sparîts, come lis coloniis. Al ven cualchidun che si ferme tai albiercs, ma gjavant chei di Darte e chei di cualchi altri paîs, la plui part di chescj a fasin une stagjon curtissime e al è râr di cjatâju “dut complet” (Darte, che e à implants termâi e altris curis, no à ancjemò une pissine e alore si va a Mauthen!). La emigrazion e à puartât cualchi benefici pes fameis, cualchidun al è rivât a sistemâ la cjase, ma nol à mai tornât a puartâ int. I vilegjants e tancj cjargnei a son scjampâts de Cjargne e nissun ur à corût daûr.
CE SI PUEDIAL FÂ_Soredut si à di tignî simpri impiade la curiositât de int pontant sì su la gastronomie, che la varà simpri plui dure, ma soredut su la storie e sui lûcs di valôr artistic, su un ambient naturâl tignût mont e net. Di sigûr no si pues lâ ogni volte a visitâ il museu cjargnel a Tumieç o chel de prime vuere a Timau o chel di Zui, o la pinacoteche di Trep o la farie dal Checo a Çurçuvint dulà che si pues dâ un cuc aes culturis des jerbis medisinâls, ma ancje lâ a viodi lis bielecis naturâls di Raviei, di Fresis, di Lungjis, di Felton o Mion o Davaste, o Pesariis o Paulâr. Dopo bisugnarès che o tornassin a jessi ospitâi come une volte, a cjalâ il forest no tant che un siôr che al ven a rompi i cits, ma tant che un che al à gust di vivi lis tradizions e la nestre storie. Se invezit o continuarìn a trai a salvadi, o restarìn di bessôi dismenteant ce che o podevin contâ e tignî in pîts. Il prin obietîf (la curiositât) al varès di jessi compit de Regjon, il secont (la ospitalitât) al è de int, dai Cjargnei.
Marino Plazzotta
____________________________________________
Letare di Daniel Spizzo (“Carnia ggi”, ed. Chei di somavile, Paluce)
“La che si jes pe Cjargne, al Km 59 de autostrade A23 Alpe-Adria si cjate un imbroi. Il Comun di Cjargne nol esist. Di lunc in fûr de autostrade o cjatarês simpri sul ultin cartel de jessude i nons dai Comuns plui visins ai casei: Palme, Udin Sud, Udin Nord, Glemone-Osôf, Pontebe-Malborghet, Tarvis. Tal câs de jessude par Cjargne-Tumieç, al è evident che si è fate une ecezion, Cjargne – che al è il non da piçule frazion di Vençon clamade ancje Stazion pe Cjargne -.
Il viazadôr curiôs che al rive di lontan e che al è diret in Cjargne nol pues evitâ di fâsi cualchi domande: cemût mai cjatìno il non di une piçule frazion, a letaris grandis suntun cartel uficiâl de autostrade? Cemût vegnial prime di Tumieç o di Vençon o di Damâr. Nol saressial stât plui logjic scrivi Damâr-Tumieç?”
Une biele domande!
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +