Il sorpas de Universitât dal Friûl su Triest

«In cheste zornade simboliche pal nestri Ateneu, o pant il gno salût plui vivarôs ai Retôrs talians e forescj, ai ospits ilustrissims, ai students e a dute la comunitât universitarie. O auguri a ducj un an plen di sodisfazions, che o soi sigûr che no mancjaran». Il retôr de Universitât dal Friûl, Alberto Felice De Toni,  al à doprât ancje il furlan par scomençâ il so discors in ocasion de viertidure de l’an academic 2016-2017.
Un an che al tache bielzà cun tune grande sodisfazion che e fâs tornâ indaûr cui timps ai derby tra l’Udin e la Triestine: pe prime volte te so storie l’Universitât cun sede a Udin e pues contâ su plui iscrits di chê di Triest. Il dât al salte fûr de anagrafe nazionâl students publicade dal sît internet dal Miur, il Ministeri de istruzion, universitât e ricercje: ai 4 di Otubar a son 15.266 i fantats che a an sielzût l’ateneu furlan cuintri i 14.970 che a frecuentin lis aulis di San Just. Un sorpàs rivât propit intal an dal 40^ aniversari dal Taramot, catastrofe che dongje de rinassite e à pocât il popul furlan a domandâ di vê une sô universitât. Impensìnsi di fat che la sô istituzion e je rivade cu la Leç de ricostruzion, la 548 dal 8 di Avost dal 1977, prin e unic câs di cheste sorte in Italie.
Naturalmentri dongje di cheste sodisfazion no bisugne dismenteâsi che il mont academic dal Friûl-Vignesie Julie al pues continuâ a cressi dome in gracie di une colaborazion costante cun Triest e la Sissa.
Il retôr De Toni tal so discors al à volût lançâ une gnove iniziative, il Cantîr Friûl, ispirantsi al detât istitutîf de stesse Universitât, ven a stai il progrès civîl, sociâl e la rinassite economiche dal Friûl. In sostance a saran viertis des oficinis tematichis, dulà che si incuintraran professôrs, professioniscj, categoriis, lavoradôrs, politics par provâ a dissegnâ il Friûl dal doman. ❚